Atyraýda shomylý maýsymy bastalǵaly 6 adam sýǵa batyp ketken
Oblystyq tótenshe jaǵdaılar departamentiniń baspasóz qyzmetinen málim etkendeı, sýǵa shomylý maýsymy bastalǵan 15 maýsymnan beri 6 adam sýǵa batyp, jantásilim etken.
Onyń ishinde kámeletke tolmaǵan 3 jasóspirim bar.
Tótenshe jaǵdaılar departamentiniń qutqarýshylary sý aıdyndaryna batyp bara jatqan 6 adamdy qutqardy. Sýdan qutqarylǵandardyń arasynda 4 jasóspirim bolǵan.
«Atyraý oblysynyń sý aıdyndarynda turǵyndardyń qaýipsizdigin qamtamasyz etý jumystaryn baǵalaý maqsatynda tótenshe jaǵdaılar departamentiniń ınspektorlyq quramy qalalyq jaǵajaılardy tekserdi. Baǵalaý nátıjesine sáıkes Jaıyq ózeniniń jaǵalaýyndaǵy «Evrazııa» JShS men «Nomad» JK-nyń jaǵajaılary sý aıdyndaryndaǵy qaýipsizdik qaǵıdalarynyń talaptaryna sáıkes keledi. Jaǵajaılarda qajetti talaptar saqtalǵan. Ár jaǵajaıda arnaıy oqytylǵan 4 qutqarýshy qyzmet atqarady. Alǵashqy medıtsınalyq kómek kórsetý úshin qajetti jabdyqtar men dári-dármektermen qamtylǵan medıtsınalyq pýnktter qurylǵan. Balalar úshin arnaıy ýchaskeler dýalmen jáne qaltqylar jelisimen qorshalǵan», -deıdi tóótenshe jaǵdaılar departamenti bastyǵynyń orynbasary, azamattyq qorǵaý polkovnıgi Ashat Erjanov.
Bıyl Atyraý qalasynda Jaıyq ózeniniń jaǵalaýynda 5 jaǵajaı jumysty tegin isteıdi.
Bular – «Atyraý» dene shynyqtyrý-saýyqtyrý kesheni mańyndaǵy «Evrazııa» JShS-niń, I.Mechnıkov kóshesindegi «Atyraý saıabaq», «Turǵyn úı qalashyǵy» shaǵynaýdanyndaǵy «NOMAD» (Malıbý) jáne «LUCH» jaǵajaılary.
«Qazir kún kúrt ysydy. Osyǵan baılanysty turǵyndar sý aıdyndaryna shomylýǵa jıi barady. Turǵyndardan qaýipsizdik talaptaryn saqtap, balalardy kózden tasa qylmaýǵa shaqyramyz», -deıdi Ashat Erjanov.
Eske sala ketelik, Atyraý oblysynda jyl basynan beri 10 adam sýǵa ketkenin jazǵan bolatynbyz.