Atyraýda sheteldik kompanııa koronavırýspen kúreske 1,3 mlrd teńge bóldi
ATYRAÝ. QazAqparat –Atyraýda «Teńizshevroıl» birlesken kásiporny koronavırýspen kúres sharalaryna 1,3 mlrd teńge bóldi. Bul týraly kompanııanyń Úkimetpen jáne qoǵammen baılanys bóliminiń bas menedjeri Rzabek Artyǵalıev málim etti, dep habarlaıdy QazAqparat tilshisi.
Onyń aıtýynsha, Teńiz ken ornynda medıtsınalyq qural-jabdyqtarmen qamtylǵan 300 oryndyq oqshaýlaý orny daıyndalǵan. Qazir kompanııa qyzmetkerleri dene qyzýy ólshengennen keıin ǵana jumys ornyna jiberiledi. Al, keńse qyzmetkerleriniń 70% qashyqtan jumys isteý rejımine kóshken. Olardyń jalaqysy saqtalady.
«Kompanııanyń esebinen bólingen 1,3 mıllıard teńgege medıtsınalyq qurylǵylar men jabdyqtar satyp alynyp, Atyraý oblysynyń densaýlyq saqtaý mekemelerine beriledi. Qazirdiń ózinde qurylǵylardyń bir bóligi ákelindi. Qalǵany jaqynda jetkiziledi. Sondaı-aq, «Teńizshevroıldyń» bastamasymen «Atyraý-Astrahan» tas joly boıyndaǵy oqshaýlaý beketi jabdyqtaldy», -dedi Rzabek Artyǵalıev.
