Atyraýda sheneýnikter men bıznesmenderge qatysty ótip jatqan sot isinde BAQ ókilderine barlyq jaǵdaı jasalǵan

BAQ-tyń jedel jumysyn qamtamasyz etý úshin arnaıy bólme ázirlenip, onda úlken monıtor qoıylǵan. Odan sot zalynda ótip jatqan barlyq is-qımyldy jiti baqylap otyrýǵa bolady. Sondaı-aq bólmede prınter ornatylyp, symsyz ǵalamtor jelisi qosylǵan.

Esterińizge sala keteıik, búgin mıllıardtaǵan bıýdjet qarajatyn talan-tarajǵa saldy dep aıyptalǵan 22 adamnyń isin qaraý bastaldy.

Buǵan deıin habarlanǵandaı, Bergeı Rysqalıev, onyń aǵasy Amanjan Rysqalı, sondaı-aq, olardyń taǵy 9 sybaılasy halyqaralyq izdeýde. Kórsetilgen tulǵalarǵa qatysty qylmystyq istiń materıaldary jeke óndiriske shyǵaryldy.

Rysqalıevtiń qylmystyq tobynyń músheleri jasaǵan aýyr jáne asa aýyr sybaılas jemqorlyq jáne ekonomıkalyq qylmystardyń nátıjesinde memleket pen azamattarǵa jalpy somasy 71 mlrd. teńge zalal keltirilgen. Qarjy polıtsııasy qabyldaǵan sharalardyń nátıjesinde memleketke 23,6 mlrd. teńgeniń múlki qaıtaryldy.

Keltirilgen zalaldy ári qaraı óteý maqsatynda tergeý barysynda jalpy quny 42 mlrd. teńgeni quraıtyn aıyptalýshylardyń jyljymaly jáne jyljymaıtyn múlkiniń 580-nen astam túrine tyıym salyndy. Onyń ishinde 5 aıaqtalmaǵan qurylys nysany, 73 jer ýchaskesi, 2 ákimshilik ǵımarat, 13 turǵyn úı, 12 keńse, 23 páter jáne t.b.; 197 kólik quraly, kommertsııalyq uıymdardyń jarǵylyq kapıtaldaryndaǵy 31 qatysý úlesi, túrli jabdyqtardyń 145 birligi, 19 bank shottary bar.

Budan basqa, Shveıtsarııa konfederatsııasynyń Federaldyq prokýratýrasy Shveıtsarııadaǵy bankterdegi Bergeı Rysqalıevtiń týysqandary men onymen sybaılas tulǵalardyń shottaryndaǵy kólemdi aqsha qarajattaryna tyıym salǵan.

2013 jylǵy 11 maýsymda Shveıtsarııaǵa osy memlekettiń aýmaǵynda tergeý amaldaryn júrgizý jóninde halyqaralyq tapsyrma joldandy.

Sondaı-aq Atyraý oblysynyń burynǵy ákimi Bergeı Rysqalıevke qatysty taǵy bir qylmystyq is qozǵaldy. Ol lańkestik áreketterge qarsy bolmady, qaıta ony quptap, qoldap otyrǵan dep kúdiktelýde. Tergeý nusqasy boıynsha, aımaqtyń burynǵy jetekshisi ıslamdaǵy dástúrli emes aǵym ókilderine meshit salýǵa zańsyz túrde jer ýchaskesin bólip bergen. Óńirde lańkestik áreket jasady dep qamaýǵa alynǵandardyń kóbisi osy meshitke barǵan. Qazir belgili bolǵandaı, onda lańkestik nasıhattalyp, lańkestik áreketterdi qarjylandyrý úshin aqsha jınalǵan.