Atyraýda shekarashy ózine pyshaq salǵan kúdiktini tapanshamen atyp jaralady
ATYRAÝ. QazAqparat - Atyraý shekara otrıadynyń «Sazdy» shekara zastavasynda kúdikti adamdy ustaý barysynda shekarashylar qarý qoldanýǵa májbúr boldy, dep habarlaıdy QazAqparat QR UQK ShQ baspasóz qyzmetine silteme jasap.
«Jaǵalaý kúzeti» óńirlik basqarmasynyń otrıadyna qarasty «Sazdy» shekara zastavasynyń aýmaǵynda zastava bastyǵynyń orynbasary basqarǵan shekara jasaǵy qyzmettik qarýyn qoldana otyryp belgisiz er adamdy ustady», - delingen habarlamada.
Oqıǵa 2018 jylǵy 10 qarashada bolǵan. «Sazdy» shekara zastavasyna jaqyn mańdaǵy aýyldardyń biriniń turǵyny qońyraý shalyp memleketttik shekara syzyǵynyń mańynan kúdikti adamdy baıqaǵandyǵyn habarlaǵan. Aıtylǵan jerge tez arada shekara jasaǵy jiberilgen.
«Beıtanys adam, rıýkzagynyń ishinde ne bar ekendigin kórsetýdi talap etken jasaq basshysyna pyshaq siltep, jaralaǵan. Ózin qorǵaý jáne kúdiktini qolǵa túsirý úshin shekara jasaǵynyń basshysy tabeldi qarýynan oq atyp, shabýyl jasaýshyny qulatqan. Ustalǵan adamǵa Qıǵash aýylynyń feldsheri alǵashqy dárigerlik kómek kórsetkennen keıin, ári qaraı shekara jasaǵy ony Qurmanǵazy aýdandyq emhanasyna medıtsınalyq kómek kórsetý úshin alyp ketti», - delingen habarlamada.
Jaraly ofıtserdiń jaǵdaıy aýyrlaý bolǵandyqtan, sol mańdaǵy eń jaqyn medıtsınalyq mekeme, Reseıdiń Astrahan oblysyndaǵy Krasnyı ıAr eldi mekenininiń aýrýhanasyna jetkizilip, ota jasaldy. Qazirgi ýaqytta ofıtser sol emhananyń hırýrgııa bóliminde. Jaǵdaıy ortasha dep baǵalanýda.
Baspasóz qyzmetiniń málimetinshe, bolǵan oqıǵa týraly quqyq qorǵaý organdary qulaqtandyryldy. Qazir tergeý amaldary júrgizilýde.
