Atyraýda shekarashy aýyl turǵynyna ne sebepti oq atqany belgili boldy
ATYRAÝ. QazAqparat - Atyraýda er adamdy jaraqattaǵan shekarashy brakonerlerge kómekke kelgen adamdardyń shabýylynan ózin qorǵaǵan, dep habarlaıdy «QazAqparat» HAA tilshisi.
Eske sala keteıik, oqys oqıǵa ótken kúni keshke qala mańyndaǵy Damba aýylynda bolǵan. Shekarashylar ózendegi Kaspıı teńizi jaqtan kelgen úsh qaıyqty kórgen. Ondaǵylar qaıyqtaryn jaǵalaýǵa baılap, qaıyqtaǵy balyqtardy sol tusqa taıap kelgen mototsıklge tıeı bastaǵan. Shekarashylar brakonerlerdi ustamaq bolyp umtylǵanda, olarǵa aýyldyń taǵy da 30 turǵyny kómekke kelgen. Ofıtser eskertý úshin oq atqan, biraq shabýyldaýshylardy toqtatý úshin bul jetkilikti bolmaǵan.
«Qorǵanys úshin ofıtser jerge qaraı oq atýǵa májbúr bolǵan. Aýyldan adamdar kelip aralasýyn paıdalanǵan brakonerler qaıyqtaryna otyryp, ózen boıymen júzip ketken, mototsıkl de izin sýytqan. Keıinnen aýyldyń aıaǵy jaraqattanǵan bir turǵyny Atyraý emhanalarynyń birine barǵan. Qazirgi kezde onyń túngi oqıǵalarǵa qatysy bar-joǵy tekserilýde. Osy fakti boıynsha sotqa deıingi tergeý amaldary bastalǵan, sondaı-aq áskerı qyzmetkerdiń qarýdy qoldanýynyń zańdylyǵy da tekserilýde», - dep málimdedi Batys óńiriniń prokýrory Janbolat Aekenov.
