Atyraýda shekaradan zańsyz ótken Tájikstan azamatyna sot úkimi shyqty
ATYRAÝ. QazAqparat - Shekarany zańsyz kesip ótken Tájikstan azamatyna sot úkimi shyqty, dep habarlaıdy QazAqparat tilshisi.
«Sottalýshy N. zańdy buzǵany úshin Atyraý qalasynyń mamandandyrylǵan ákimshilik sotynyń 2017 jylǵy 24 sáýirdegi qaýlysymen Qazaqstan Respýblıkasynyń sheginen tysqary jerge 5 jyl merzimge shyǵarylyp jiberilgen. Sol ýaqytta onyń jeke tólqujatynda basqa esim kórsetilgen. Ol óziniń shynaıy esimi R. kórsetilgen tólqujatymen endi qaıta Qazaqstan Respýblıkasy aýmaǵyna kire almaıtynyn bilip, qylmystyq áreketke barǵan. Atap aıtqanda, tólqujatyndaǵy málimetti tolyqtaı ózgertip, Qazaqstan Respýblıkasynyń shekarasyn zańsyz kesip ótken», - dep habarlady oblystyq sottyń baspasóz qyzmetinen.
Sot úkimimen sottalýshy N. kináli dep tanylyp, ony Qazaqstan Respýblıkasynyń sheginen tysqary jerge 5 jyl merzimge shyǵaryp jiberý jáne 481 000 teńge aıyppul salý jazasy taǵaıyndaldy.
