Atyraýda sharýalardyń dabylynan soń kanaldarǵa tórt túlik úshin sý jiberildi
Atyraý oblysynda tórt túlikke qajetti sýdyń tapshylyǵy baıqalyp otyr. Ásirese, Inder aýdanyndaǵy Baǵyrlaı, Alǵabas-Joryq kanaldarynda sý azaıǵan. Sharýa qojalyǵynyń jetekshileri kanaldaǵy qatqan muzdy oıyp, mal sýarýǵa áreket jasaǵan. Al, Atyraý qalasynyń mańyndaǵy Qaıyrshaqty aýyldyq okrýgindegi sharýa qojalyǵynyń ıeleri Qarǵaly kanalynda sý joqtyǵyn aıtyp, dabyl qaqqan.
Qazir Inder aýdanyndaǵy Baǵyrlaı, Alǵabas-Joryq, Aqsaı kanaldaryna sý jiberý jumysy qolǵa alyndy. Bul jumysqa 22 qyzmetker men 3 tehnıka tartylǵan. Qaıyrshaqty aýyldyq okrýgindegi Qarǵaly kanalyna da sý kelgen.
«Tehnologııalyq tsıklde elektr jáne jylý energııasyn óndirýge qoldanylǵan býdy salqyndatý úshin Jaıyq ózeniniń sýy paıdalanylady. «Atyraý jylý-elektr ortalyǵy» AQ-nyń Jaıyq-Kaspıı basseındik ınspektsııasynan naýryz-qarasha aılary aralyǵynda Prımorsk sýarý júıesine sý aǵyzýǵa arnaıy ruqsaty bar. Kásiporyn 1 jeltoqsannan 1 naýryzǵa deıin aınalymdy sýmen jabdyqtaý júıesinde jumys isteıdi. Osy kezeńde paıdalanylǵan sýdy aǵyzýǵa tyıym salynady», - dep habarlady Atyraý oblysy energetıkalyq kesheniniń baspasóz qyzmeti.
Alaıda, atalǵan kásiporyn ókiletti organnan Qaıyrshaqty aýyldyq okrýgindegi fermerlik qojalyqtar úshin sý aǵyzýǵa ýaqytsha ruqsat berý týraly ótinish bildirgen. Ruqsat alǵannan keıin Qarǵaly kanalyna sý jiberilgen.
Eske sala ketelik, buǵan deıin Atyraý oblysynda topyraq qabatyn búldirgen sharýa qojalyǵyna aıyppul salynǵanyn jazǵan edik.
