Atyraýda sharýa qojalyǵynan tegin bıznes-jospar úshin 25 myń teńge talap etken
Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, bul týraly kásipkerden shaǵym túsken.
«Óńirlik kásipkerler palatasynyń qyzmetkeri 2021 jyldan beri 427 bıznes sýbektisi úshin bıznes-jospar ázirlegen. Kásipkerdiń aıtýynsha, palata qyzmetkeri bıznes-jospardy ázirlegeni úshin sharýa qojalyǵynan 25 myń teńge talap etken. Bul bıznesti memlekettik qoldaý sharasy retinde iske asyrylýy kerek. Úkimettiń qaýlysyna sáıkes bıznes-jospardy ázirleý óteýsiz negizde júrgiziledi», -dep habarlady departamenttiń baspasóz qyzmeti.
Osyǵan baılanysty departament tarapynan óńirlik palataǵa mundaı faktilerge jol bermeý, tıisti shara qabyldaý týraly usynys joldanǵan.
Sondaı-aq, bul derek aqparatty esepke alý kitabynda tirkelgen.
Protsestik sheshimder qabyldaý, basqa da derekterdi anyqtaý úshin oblystyq polıtsııa departamentiniń qaraýyna berilgen.
Eske sala ketelik, buǵan deıin Atyraýda qos aýrýhana kásipkerlerge 900 mln teńgeden astam qarjyny tólemeı kelgenin habarlaǵan bolatynbyz.
Departament qyzmetkerleri eki aýrýhana jumysyna monıtorıng júrgizgen. Monıtorıng qorytyndysymen 64 kásipkerlik sýbektisine memlekettik satyp alý boıynsha kórsetilgen qyzmetter men taýarlardy jetkizgeni úshin 900 mln teńgeden astam aqshalaı qarajatty tólemeý faktileri anyqtalǵan.
Sondaı-aq, Atyraýda memlekettik kirister departamenti kásipkerge 5,4 mln teńge depozıtin qaıtarmaǵanyn jazǵan edik.
