Atyraýda shartty túrde sottalǵan jigit tún jarymynda meıramhanada kóńil kóterip júr

ATYRAÝ. QazAqparat – Atyraýda shartty túrde sottalǵandar túngi mezgilde úıde bolý talabyn saqtamaıdy. Sottalýshynyń biri meıramhanada kóńil kóterip júr, dep habarlaıdy QazAqparat.

Atyraý qalalyq probatsııa qyzmetiniń bastyǵy Meıirbek Orazǵalıevtyń aıtýynsha, ýchaskelik polıtsııa ınspektorlarymen birge «Esepke alý» jedel-profılaktıkalyq is-sharasy ótkizilip jatyr.

«Qoǵamnan oqshaýlanbaı, jazasyn shartty túrde óteýge sottalǵandar adamdarǵa qoıylatyn talaptar bar. Sonyń biri – túngi mezgilde turǵylyqty mekenjaıynda bolý. Alaıda, tekserý kezinde keıbir sottalýshylardyń úıinde otyrmaıtyny anyqtaldy. Taldaý kórsetkendeı, olardyń keıbiri meıramhanalarda kóńil kóterip júredi. Máselen, Almasbek esimdi sottalýshy tekserý kezinde úıinde bolmaı shyqty. Keıin onyń meıramhanada otyrǵany belgili boldy. Al, keıbiri týystarynyń úıine qonaqqa barady», - deıdi Atyraý qalalyq probatsııa qyzmetiniń bastyǵy Meıirbek Orazǵalıev.

Tekserý kezinde úıinde bolmaǵan sottalǵandarǵa ákimshilik hattama toltyryldy. Endi jınaqtalǵan is-qujattary sotqa joldanady.

«Shartty túrde sottalǵandarǵa talapty saqtaýdy udaıy eskertip kelemiz. Olardyń tarapynan talap jıi buzylatyn bolsa, keıbiri jazasynyń qalǵan bóligin túrmede ótkizýi múmkin», -dep málim etti Meıirbek Orazǵalıev.

Eske sala ketelik, budan buryn qańtar oqıǵasyna qatysqan atyraýlyqtyń biri tergeý ızolıatoryna qamaýǵa alynǵanyn jazǵan edik.

Atyraý oblystyq qylmystyq ister jónindegi mamandandyrylǵan aýdanaralyq sotynyń aqparatyna qaraǵanda, kúdikti basty sot otyrysyna kelmeı qalǵan.

Oǵan sottyń ótetin ýaqyty men orny týraly habarlanǵan. Alaıda, ol sot otyrysyna kelmeý sebebi týraly habar bermegen.

Sot otyrysy hatshysynyń men advokatynyń birneshe ret shalǵan qońyraýyna jaýap bermedi. Narkologııalyq anyqtamaǵa sáıkes sottalýshynyń masań kúıde ekeni anyqtalǵan.

Sot qaýlysymen qoldanylǵan úıqamaq túrindegi sharasyn ózgertilip, sottalýshy tergeý ızolıatoryna qamaldy.