Atyraýda shańdy daýyl soǵyp tur
ATYRAÝ. QazAqparat – Búgin tańerteńnen beri Atyraýda shańdy daýyl soǵyp tur, dep habarlaıdy QazAqparat.
Atyraý oblysynda ókpek jel uıytqı soǵyp tur. Keshe atyraýlyq turǵyndarǵa 112-den: «4 qarashada Atyraý oblysynda jeldiń uıytqýy 15-20 metr/sekýndqa deıin jetedi», degen eskertý kelgen edi.
Búgin uıytqı soqqan ókpek jeldiń ekpini shańdy daýyldy kóterdi. Dál qazir Atyraý qalasynda shańdy daýyl basyp tur.
«Oblys aýmaǵynda jeldiń kúsheıýi, tuman jáne jaýyn-shashyn kútilip otyr. Kúzgi-qysqy kezeńniń bastalýymen aýa-raıynyń, ıaǵnı meteorologııalyq jaǵdaıdyń ózgerýi kólik júrgizýge áldeqaıda qaýipti bolady. Jolda óte muqııat bolýdy eskertemiz. Jyldamdyq rejımin, sondaı-aq avtomobılder arasyndaǵy qaýipsiz araqashyqtyqty saqtaǵan jón. Bul joldaǵy kútpegen apattyń aldyn alý úshin mańyzdy» -dep júrgizýshilerge eskertý jasady oblystyq polıtsııa departamenti.
Eske sala ketelik, buǵan deıin Atyraýda shańdy daýyl soǵyp turǵanyn habarlaǵan bolatynbyz.
