Atyraýda «Servıstik ákimdik» front ofısteri iske qosylady

ATYRAÝ. QazAqparat – Qyrkúıekte Atyraýda oblys, qala jáne aýdan ákimdikterinde «Servıstik ákimdik» front ofısteri iske qosylady, dep habarlaıdy QazAqparat oblys ákiminiń baspasóz qyzmetine silteme jasap.

«Servıstik ákimdik» memlekettik qyzmet kórsetýshi mekemelerdi bir jerge ortalyqtandyrý men azamattarǵa qolaıly jaǵdaı jasaýǵa múmkindik beredi. Sharýasy qaýyrt jan qala nemese aýdandaǵy bólimderdi izdep sabylmaı, bilim berý, densaýlyq saqtaý, jumyspen qamtý jáne áleýmettik qorǵaý, turǵyn úımen qamtamasyz etý, sáýlet jáne qala qurylysy, jer qatynastary máseleleri boıynsha qajetti qyzmetke bir jerden qol jetkizedi.

Bastysy, bul halyqqa qyzmet kórsetý ortalyqtarynyń qyzmetin qaıtalamaıdy. Qyzmet alýshy úshin ákimdik ǵımarattarynda jaıly jaǵdaı týǵyzý – negizgi ustanym.

«Servıstik ákimdik» front ofısteri ákimdik ǵımaratynyń birinshi qabatynda ornalasady. Onda qyzmet alýshy úshin arnaıy elektrondy kezek zaly, kelýshiler úshin kútý zaly, tegin wi-fi jelisi men bankomat, tólem termınaly, arnaıy e-gov portalyna qosylǵan termınal, ákimdiktiń turǵyndarmen «Ashyq dıalog» formatynda jumys isteýi úshin open space zaldary jumys jasaıdy.

Front ofıster qyzmetin Atyraý oblysy ákiminiń birinshi orynbasary, «Atyraý – adaldyq alańy» jobalyq keńsesiniń kýratory Nurlan Taýbaev qadaǵalaıdy.