Atyraýda sertıfıkattalmaǵan 244 myń teńgeniń dárisi tárkilendi

ATYRAÝ. QazAqparat – Atyraý qalasynda zańsyz satýshydan sertıfıkattalmaǵan 244 myń teńgeniń dárisi tárkilendi, dep habarlaıdy QazAqparat Qarjy monıtorıngi komıtetiniń baspasóz qyzmetine silteme jasap.

Komıtettiń Atyraý oblysy boıynsha Ekonomıkalyq tergeý departamenti qyzmetkerleri qala turǵynynan dáriniń qymbatqa jáne arnaıy ruqsatsyz (lıtsenzııasyz) satqanyn anyqtady.

«Іs QR Ákimshilik quqyqbuzýshylyq kodeksiniń 426-baby «Farmatsevtıkalyq qyzmettiń jáne dárilik zattar men medıtsınalyq buıymdardyń aınalysy salasynyń qaǵıdalaryn buzý» boıynsha qaralýda. Jalpy somasy 244 myń teńge Qazaqstan Respýblıkasynyń farmatsevtıkalyq baqylaýynda sertıfıkattalmaǵan reseılik dári-dármek ónimderi, atap aıtqanda, «Plavıks», «Azıtramıtsın», «Ingavırın 90», «Paratsetamol», «Tavınık», «Trombo ASS», «Kardıomagnıl» dárileri tárkilengen», delingen habarlamada.

Іstiń materıaldary Atyraý oblysy boıynsha Taýarlar men kórsetiletin qyzmetterdiń sapasy men qaýipsizdigin baqylaý departamentine jiberilip, tárkilengen dári-dármek Atyraý oblysynyń Densaýlyq saqtaý basqarmasyna berildi.

Komıtet dárilik preparattardy joǵary baǵamen satatyn dárihananyń is – áreketi belgili bolsa 8 [phone] nómirine nemese Atyraý oblysyndaǵy departamenttiń – 8 [phone] senim telefonyn habarlaýdy suraıdy.