Atyraýda saıajaıdaǵy turǵyn úıge jylan kirip ketken
Oblystyq tótenshe jaǵdaılar departamentiniń qoǵammen baılanys tobynan málim etkendeı, oqıǵa keshe, 5 maýsymda tirkelgen.
«Departamenttiń dıspetcherlik pýltine keshe, 5 maýsymda keshki saǵat 20.28-de turǵyn úıge jylannyń kirip ketkeni týraly habar tústi. Atyraý qalasynyń «Kóktem» shaǵyn aýdany aýmaǵynda ornalasqan saıajaı ýchaskesindegi turǵyn úı ıesi jylytý qazandyǵy bar bólmeden jylandy baıqap qalǵan. Shaqyrtý ornyna jetken qutqarýshylar arnaıy quraldardyń kómegimen jylandy ustap aldy. Baýyrymen jorǵalaýshyny plastıkalyq shelekke salyp, tabıǵı mekenine jiberdi», - dep habarlady departamenttiń qoǵammen baılanys tobynan.
Osyǵan baılanysty Atyraý oblystyq tótenshe jaǵdaılar departamentiniń mamandary turǵyndarǵa este saqtaýǵa tıis keńes usynyp otyr.
«Jylandy kórgen kezde oqys qımyl jasaýǵa, júgirýge bolmaıdy. Jylannyń ózdiginen ketip qalýyna jol berý qajet. Eger jylan adamdy shaǵyp alsa, onda ony kóldeneń kúıde jatqyzyp, tynyshtyq saqtaý kerek. Osydan keıin medıtsınalyq mekemege jetkizgen jón», - dep málim etti qoǵammen baılanys tobynan.
Eske sala ketelik, buǵan deıin Atyraý oblysynda bıylǵy bes aıda 5 adam sýǵa batyp ketkenin jazǵan edik.
