Atyraýda saýda jelileri azyq-túlik jetkizýshilerden tólemderdi zańsyz talap etken
Básekelestikti qorǵaý jáne damytý agenttigi Atyraý oblysy boıynsha departamentiniń mamandary azyq-túliktiń rıteıl naryǵyna taldaý júrgizgen.
«Áleýmettik mańyzy bar azyq-túlik taýarlaryn kóterme jetkizýshilerden retro bonýstar jáne dúken sórelerinde ónim kórsetilgeni úshin marketıngtik tólemderdi talap etýge qatysty «Ideal Market» JShS (Ideal, Lıder dúkenderi), «TD ıArmarka» JShS, «Anvar» JShS jáne «Marco» JShS-niń saýda jelileri tarapynan buzýshylyqtar anyqtaldy.
Máselen, kúnbaǵys jáne sary maı, sút ónimderin kóterme jetkizýshilerimen sharttar jasaý kezinde 2%-dan 7%-ǵa deıin syıaqy tóleý belgilengen. Іshki saýda qaǵıdalaryna sáıkes ishki saýda sýbektisiniń (bul jaǵdaıda joǵaryda kórsetilgen saýda jelileri) Qazaqstan Respýblıkasynyń Úkimeti bekitetin tizbede kórsetilgen áleýmettik mańyzy bar azyq-túlik taýarlaryn satyp alýyna baılanysty syıaqy tóleýge jol berilmeıdi. Bul qosymsha marketıngtik tólemder esebinen baǵanyń ósýine jol bermeý maqsatynda qarastyrylǵan», - delingen óńirlik departamenttiń aqparatynda.
Osyǵan baılanysty aqparat tıisti sharalar qabyldaý úshin Atyraý qalalyq kásipkerlik jáne aýyl sharýashylyǵy bólimine jiberildi.
Eske sala ketelik, budan buryn Atyraýda tutynýshylardyń 1 mln teńgeden astam tólemi qaıta esepteldi.
