Atyraýda saýda ortalyǵyna kelgender eskalatordan qulady
ATYRAÝ. QazAqparat - Áleýmettik jelide zardap shekkenderdiń týǵan-týystary 8 jeltoqsanda eskalatordyń biri isten shyǵyp, eki áıel men úsh jasar qyzdyń qulaǵandyǵy jaıly aqparat taratty, dep habarlaıdy «Moı gorod».
«Tamasha» saýda oıyn-saýyq ortalyǵynyń kúzetshileri men satýshylarynyń sózderine qaraǵanda, bul eskalatorǵa baılanysty birinshi oqıǵa emes. Belgili bolǵandaı, mundaǵy taıanysh uzaq ýaqytan beri istemeıdi, al tutqaǵa osy jaǵyndaǵy taıanyshtyń jumys istemeıtindigi týraly eki tilde jazylǵan japsyrma bar.
« Buǵan jurttyń bári nazar aýdara bermeıdi. Bireýler sábıin kóterip kele jatqan shyǵar, oqı almaıtyndar da kezdesip qalady. Olardyń tutqaǵa jarmasýy ábden múmkin. Saýda ortalyǵy qonaqtardyń qaýipsizdigin qamtamasyz etý úshin naqty sharalardy qabyldaýy kerek. Eskalatordy óshirip tastaý kerek ne bolmasa buzylyp turǵan jaǵyn lentamen qorshaý qajet», - dep jazdy aty-jóni belgisiz jan.
«Tamasha» saýda oıyn-saýyq ortalyǵynyń basshylary keleńsiz jaǵdaıdyń 8 jeltoqsanda kúndizgi saǵat 11-ler shamasynda bolǵanyn rastady.
«Egde jastaǵy áıel men onyń týystary eskalatorda qulaǵan oqıǵa oryn aldy. Saýda ornynyń eki qyzmetkeri eskalatordy óshirip, zardap shekkenderge kómektesti. Ákimshilik osy oqıǵa saldarynan jaraqat alǵandardan keshirim suraıdy», - dep naqtylady saýda ortalyǵynyń basshylyǵy. Olar jumys istemeıtin taıanysh jaıly aıta kele, kelýshilerge abaı bolýdy eskertedi.
