Atyraýda satylyp jatqan balalar oıynshyǵynyń 56 túri tekserildi
Óńirlik kommýnıkatsııalar qyzmetiniń málimetinshe, oblystyq sanıtarııalyq-epıdemıologııalyq baqylaý departamentiniń mamandary balalarǵa arnalǵan oıynshyqtar men basqa da taýarlardy satyp alý kezinde tańbalanýyna erekshe nazar aýdarý qajettigin eskertedi.
«Tutynýshyǵa jetkizilýi kerek negizgi aqparat qaptamada kórsetilgen. Onda óndirýshi týraly málimetter men ónim daıynalǵan materıaldyń quramy, jas shekteýleri jazylady. Oıynshyqtardy dúkennen kezdeısoq satyp alýdyń qajeti joq. Mundaı saýda oryndarynda ónimge sapa sertıfıkaty berilmeıdi. Sertıfıkat – oıynshyqtardy satyp alý kezinde eskeretin jaıt. Óıtkeni, sapasyz ónimder densaýlyqqa zııan keltiredi. Máselen, qorǵasyn qosylǵan boıaýmen boıalǵan oıynshyq ólimge ákep soǵýy múmkin. Qorǵasyn anemııanyń órshýine, ımmýnıtettiń tómendeýine, metabolızmniń buzylýyna, ósýdiń baıaýlaýyna yqpal etip, ortalyq júıke júıesiniń zaqymdalýyna, aqyl-oıdyń damýynyń toqtaýyna ákeledi. Osy oraıda sońǵy tekseriste 56 oıynshyqtyń 38-inde sáıkessizdik oryn alyp otyr», -deıdi Atyraý oblysy sanıtarlyq-epıdemıologııalyq baqylaý departamenti tehnıkalyq reglamentterdiń talaptaryn baqylaý bóliminiń basshysy Farıza Merekeqyzy.
Onyń aıtýynsha, oıynshyqty tańdarda jaǵymsyz ıisine, aqaýyna nemese boıaýdyń sydyrylýyna jáne basqa da kóriniske nazar aýdarý kerek. Sebebi elimizge oıynshyqtar Qytaıdan, Reseı, Belorýs pen Ózbekstannan ákelinedi.
Eske sala ketelik, budan buryn Atyraýda adam ómirine qaýipti 1,5 tonnadan astam taýyq eti joıylǵanyn habarlaǵan bolatynbyz.
