Atyraýda satýshyny tapanshamen qorqytyp, tonap ketken kúdikti ustaldy
Oqıǵa 12 qarasha kúni saǵat 11:11 shamasynda Atyraý qalasynyń «Avangard» shaǵyn aýdanynda ornalasqan orman sharýashylyǵynda bolǵan. Kúdikti satýshyny tapanshamen qorqytyp, 208 000 teńge kóleminde aqshasyn alyp ketken.
Osy jaǵdaı boıynsha jedel basqarý ortalyǵyna habarlama túsedi. Kezekshi 5546 áskerı bólimi jedel maqsattaǵy batalony jaýyngerlik qamtamasyz etý rotasynyń vzvod bólimshe komandıri, aǵa serjant Nurbol Jaılıev ózine júktelgen mindetin atqarýǵa kirisedi. Ol MP-65K travmatıkalyq tapanshasymen qarýlanǵan A. esimdi kúdiktini az ýaqyt ishinde taýyp, polıtsııa bóliminiń qyzmetkerlerine baıandaǵan. Polıtsııa kezekshiniń kórsetken mekenjaıyna baryp, kúdiktini ustaıdy.
«Bul meniń Otanǵa ant bergen áskerı qyzmetker retindegi mindetim. Meniń ornymda bolǵan barlyq ulandyqtar osylaı jasaýshy edi. Eń bastysy, kúdikti qolǵa tústi», - deıdi saqshy.
