Atyraýda «Saraıshyq» kommýnaldyq bazary órtendi
ATYRAÝ. QazAqparat – Atyraýda «Saraıshyq» kommýnaldyq bazary órtendi, dep habarlaıdy QazAqparat.
Oblystyq tótenshe jaǵdaılar departamentiniń málimetine sensek, órt búgin, 16 shilde saǵat 14:52-de tutanǵan.
«Nursaıa móltekaýdany, K.Mádenov kóshesiniń 1 «A» mekenjaıyndaǵy «Saraıshyq» kommýnaldyq bazarynyń ishinde ornalasqan 50 sharshy metrlik 3 azyq-túlik dúńgirshegi otqa orandy. Órt sóndirýshiler oqıǵa ornyna 6 mınýtta jetti. Jalyn saǵat 15:15-te oqshaýlanyp, 15:51-de tolyq sóndirildi» dep habarlady baspasóz qyzmetinen.
Oqys oqıǵadan eshkim zardap shekpegen. Qazir órttiń shyǵý sebebi anyqtalyp jatyr.
Eske sala ketelik, buǵan deıin Atyraýda dámhana túgi qalmaı janyp ketken edi.
