Atyraýda sanıtarlyq talaptyń saqtalmaýynan tegin dári-dármek taratylǵan joq
Keshe áleýmettik jeliler arqyly «KomekAtyrau» qoǵamdyq birlestiginiń uıymdastyrýymen qaladaǵy Avangard yqshamaýdanynyń sońǵy aıaldamasynda tegin dári-dármek taratylatyny habarlanǵan edi. Alaıda, búgin tegin dári-dármek taratylǵan joq. Uıymdastyrýshylardyń aıtýynsha, dári-dármekti 200 adamǵa taratý kózdelgen. Alaıda, tegin dári-dármekti alý úshin 700-den 1000 adamǵa deıin jınalǵan.
Osyǵan oraı Atyraý qalalyq ákimdigi tómendegideı aqparat taratty.
«Búgin, 4 shildede «KomekAtyrau» qoǵamdyq birlestiginiń uıytqy bolýymen dári-dármek taratý aktsııasy uıymdastyryldy. Uıymdastyrýshylar qaýipsizdik sharalary men áleýmettik qashyqtyqty saqtaýdy qamtamasyz ete almady. Atyraý qalalyq ákimdiginiń bul aktsııany uıymdastyrýǵa qatysy bolǵan joq. Qazirgi ýaqytta aktsııa toqtatyldy. Uıymdastyrýshylar jaýapkershilikke tartylady.
Ákimdik óńirde halyqqa qajetti dári-dármekti jetkizýdi uıymdastyrýǵa qajetti sharalar qabyldanǵanyn habarlaıdy. Mundaı aktsııany uıymdastyrýshylar birinshi kezekte halyqtyń qaýipsizdigin oılastyrýy qajet. Barlyq aktsııa zańdylyqqa saı uıymdastyrylýy tıis. Ákimdik halyqqa kómek berý jónindegi qosymsha usynystardy qarastyrýǵa daıyn ekenin bildiredi» -delingen Atyraý qalalyq ákimdiginiń baspasóz qyzmeti taratqan aqparatta.
Al, oblystyq polıtsııa departamentiniń baspasóz qyzmeti aktsııaǵa jınalǵan halyqtyń taratylǵanyn jarııa etti.
«Polıtsııa qyzmetkerlerimen aktsııaǵa jınalǵan halyq taratyldy. Al, 7 adamǵa qatysty jınaqtalǵan is qujattary sheshim qabyldaý úshin Atyraý qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasyna tapsyryldy» -dep habarlady departamenttiń baspasóz qyzmeti.
Eske sala ketelik, budan buryn Atyraýǵa demeýshiler qoldaýymen dári-dármek jetkiziletinin habarlap edik.
