Atyraýda salyq tóleýden jaltarǵan seriktestik dırektory jaýapqa tartyldy
ATYRAÝ. QazAqparat - Atyraýda salyq tóleýden jaltarǵan seriktestik dırektory jaýapqa tartyldy, dep xabarlaıdy QazAqparat tilshisi.
Bul qylmysty Atyraý oblysy boıynsha memlekettik kirister departamentiniń ekonomıkalyq tergeý qyzmeti jedel-izdestirý sharalary kezinde anyqtaǵan.
"D. esimdi azamat quryltaıshylardyń sheshimi boıynsha JShS dırektory bolyp taǵaıyndalyp, kásipkerlik qyzmetpen aınalasqan. Ony júzege asyrý barysynda qylmystyq pıǵylyn qoldanyp, shot-faktýralardy daıyndap, jóneltilgen júk qujattardy óziniń qolymen jáne JShS-niń mórimen kýálandyrǵan. Óz kezeginde, atalǵan azamat AQ kontragenttine jalpy somasy 44 673 215 teńgeni salyq tóleýden jaltarýǵa kómek kórsetken", - dep xabarlady Atyraý oblystyq MKD baspasóz qyzmetinen.
Aıta ketelik, №2 Atyraý qalalyq sotynyń úkimimen aıyptalýshy Qylmystyq Kodekstiń «Іs júzinde jumystar oryndalmaı, qyzmetter kórsetilmeı, taýarlar tıep-jóneltilmeı shot-faktýra jazý boıynsha áreketter jasaý», «Uıymdarǵa salynatyn salyqty jáne (nemese) bıýdjetke tólenetin basqa da mindetti tólemderdi tóleýden jaltarý» baptary boıynsha kináli dep tanyldy.
Sóıtip, 1 jylǵa bas bostandyǵynan shekteý jazasy taǵaıyndalyp, kommertsııalyq uıymdarǵa basshylyq qyzmetimen aınalysýǵa 1 jylǵa tyıym salyndy.
