Atyraýda Rýmynııanyń Qurmetti konsýldyǵy ashylady
ATYRAÝ. QazAqparat Rýmynııanyń Qazaqstan Respýblıkasyndaǵy Tótenshe jáne ókiletti elshisi Chezar Manole Armıaný bastaǵan delegatsııa Atyraý oblysyna keldi, dep habarlaıdy Qazaqparat tilshisi Óńirlik kommýnıkatsııalar qyzmetine silteme jasap.
Rýmynııadan kelgen delegatsııamen Atyraý oblysy ákiminiń birinshi orynbasary Saǵyndyq Luqpanov kezdesti. Sheteldik qonaqtardyń kelýdegi basty maqsaty - eki el arasyndaǵy tyǵyz iskerlik jáne saýda-ekonomıkalyq yntymaqtastyqty ornatý.
Rýmynııanyń Qazaqstan Respýblıkasyndaǵy Tótenshe jáne ókiletti elshisi Chezar Manole Armıanýdyń aıtýynsha, Qazaqstan men Rýmynııany uzaq merzimdi saýda qatynastary baılanystyrady.
«Atyraý oblysymen yntymaqtastyq sandarmen erekshelenedi - bizdiń elderimizdiń arasyndaǵy taýar aınalymy jyl saıyn artyp keledi, sonymen qatar, munaı-gaz salasyndaǵy yntymaqtastyq ta damı tústi. Mysaly, Atyraý oblysynan Eýropaǵa eksporttalatyn munaı Rýmynııaǵa keledi, onda ol eki munaı óńdeý zaýytynda óńdeledi», - deıdi Chezar Manole Armıaný.
Rýmynııanyń Qazaqstan Respýblıkasyndaǵy Tótenshe jáne Ókiletti elshisiniń aıtýynsha, sheteldik qonaqtar Qazaqstanmen ártúrli salada - aýyl sharýashylyǵynda, bilim salasynda, IT tehnologııalary salasynda seriktestik ornatqysy keledi.
«Óńirge kelý barysynda eki kelisimshartqa qol qoıǵymyz keledi. Biri - Atyraý munaı jáne gaz ýnıversıtetimen munaı-gaz salasyndaǵy bilim baǵytyndaǵy jobalarǵa, ekinshisi - Prahov qalasy Saýda-ónerkásip palatasy men Óńirlik kásipkerler palatasy arasynda. Sondaı-aq, Atyraýda Rýmynııanyń qurmetti konsýldyǵyn ashqymyz keledi», - deıdi sheteldik delegatsııa basshysy.
Atyraý oblysy ákiminiń birinshi orynbasary Saǵyndyq Luqpanov rýmyndyq delegatsııanyń bastamasyn qoldaıtynyn aıtyp, barlyq bastamalarǵa sáttilik tiledi.
«Búgin bizdi Atyraý oblysynyń bıznes qaýymdastyǵymen, Atyraý munaı jáne gaz ýnıversıtetiniń rektorymen, Atyraý oblysynyń UKP ókilderimen kezdesý kútýde, ózge de bastamalaryńyz qoldaý tabatynyna senimdimin», - dedi Saǵyndyq Luqpanov.
Abaı ABYLAIULY
