Atyraýda ruqsatsyz salynǵan 4 qabatty turǵyn úı buzylady

ATYRAÝ. QazAqparat – Atyraýda sot sheshimimen 4 qabatty turǵyn úı buzylmaq, óıtkeni nysan ruqsatsyz salynǵan, dep habarlaıdy QazAqparat tilshisi.

Atyraý oblystyq memlekettik sáýlet-qurylys baqylaý basqarmasynyń basshysy Erlan Qabdınovtyń aıtýynsha, osyǵan baılanysty sotqa talap aryz berilip, turǵyn úıdi buzý týraly sheshim shyǵarylǵan.

«Bizdiń basqarmaǵa 2021 jyldyń tamyz aıynda bir azamattan ótinish tústi. Soǵan sáıkes Atyraý qalasyndaǵy «Leshoz» shaǵyn aýdanynda 4 qabatty kóppáterli turǵyn úı qurylysyn júrgizgen kompanııaǵa qatysty tekseris júrgizildi. Tekserý kezinde «Kóktem» turǵyn úı kesheniniń qurylys-montajdaý jumystaryn ruqsat qujattarynsyz júrgizip jatqany anyqtaldy. Atap aıtqanda, kelisilgen nobaılyq joba, jumys jobasy, saraptamanyń oń qorytyndysy men qurylystyń bastalǵany týraly habarlama alynbaǵan. Sonymen birge, ýchaskeniń nysanaly maqsaty turǵyn úı kesheni qurylysyn salýǵa sáıkes kelmeıdi», - dep málim etti Erlan Qabdınov.

Osyǵan baılanysty memlekettik sáýlet-qurylys baqylaý basqarmasy 2021 jylǵy 31 tamyzda qurylys kompanııasyna QR Ákimshilik quqyqbuzýshylyq týraly kodeksiniń 314, 316, 321, 463-baptaryna sáıkes 1 mln 043 myń 780 teńge somasyna aıyppul saldy. Sondaı-aq, zań buzýshylyqtardy joıýǵa jáne ruqsat qujattaryn alǵanǵa deıin qurylysty toqtata turý týraly nusqama berildi. Al, byltyrǵy 7 qyrkúıekte qurylys salasyndaǵy qoldanystaǵy zańnamanyń buzylýyna baılanysty atalǵan nysannyń qurylysyn toqtatý týraly sot sheshimi shyǵaryldy.

«Alaıda, oǵan qaramastan, kompanııa qurylysty odan ári jalǵastyrdy. Osyǵan baılanysty bizdiń basqarma tekserýdi qaıta júrgizdi. Onyń qorytyndysy boıynsha qurylys salýshy taǵy da 1 mln 108 myń 460 teńge ákimshilik aıyppulǵa tartyldy. Buǵan qosa, QR Azamattyq kodeksi 244-babynyń 1 jáne 2-tarmaqtary boıynsha zańsyz nysandy buzý týraly talap aryz berildi. Qazir bıylǵy 21 shildede shyqqan oblystyq ekonomıkalyq sottyń Atyraý qalasyndaǵy T. Álıev kóshesi, 11 mekenjaıynda ornalasqan «Kóktem» turǵyn úı keshenin buzý týraly zańdy kúshine engen sheshimi bar», -deıdi Erlan Qabdınov.

Eske sala ketelik, budan buryn Atyraýdan Reseıge qatynaıtyn jol qurylysy baıaý júrip jatqanyn jazǵan edik.