Atyraýda ruqsat etilmegen jerde dinı kitaptar satylmaıdy
Atyraý oblystyq din isteri basqarmasynyń habarlaýynsha, mundaı ruqsaty bar 12 saýda núktesiniń 10-y - oblys ortalyǵy, qalǵany Qulsary qalasynda ornalasqan.
«Atyraý oblystyq ІІD ekstremızmge qarsy is-qımyl basqarmasy júrgizgen tekserý qorytyndysy boıynsha bıyl dinı ádebıetter, elektrondy jaınamaz ben qurandy ruqsat etilmegen jerde saýdalaǵan 7 tulǵa anyqtalyp, jaýapqa tartyldy. Ázirge 3 azamat QR ÁQBK 490 babyna sáıkes sot aldynda jaýap berip, 84 myń teńgeden asa aıyppul arqalady, ózge ister sot qaraýynda» dep habarlady oblystyq ishki ister departamentiniń baspasóz qyzmetinen.
Esterińizge sala keteıik, dinı mazmundaǵy oqýlyq satýshylar Din isteri basqarmasy nemese jergilikti atqarýshy organdarǵa aryzdanýy tıis. Saýda-sattyq meshit aýlasyndaǵy nemese saýda oryndaryndaǵy arnaıy dúńgirshikterde ǵana ruqsat etiledi. «Din salasynda kórsetiletin memlekettik qyzmetter standartyn bekitý týraly» Zańy aıasynda kez-kelgen jerde, ásirese memlekettik organdar nemese oqý ǵımarattarynyń qasynda dinı mazmundaǵy ádebıet saýdalanbaıdy. Olar áleýmettik mańyzy bar nysandardan kem degende 300 metr alshaq ornalasýy tıis dep eskertedi sala mamandary.
