Atyraýda Rýhanı kelisim kúni atalyp ótti
ATYRAÝ. QazAqparat - Atyraýda Rýhanı kelisim kúni atalyp ótti, dep habarlaıdy QazAqparat oblys ákimdiginiń baspasóz qyzmetine silteme jasap.
Merekege arnalǵan saltanatty sharaǵa óńir basshysy Nurlan Noǵaev qatysty.
«Keńes Odaǵy ydyraǵan soń keıbir sarapshylar Qazaqstannyń bolashaǵyna kúmán keltirdi. Óıtkeni olar 100-den astam ult ókilderi turatyn eldiń bolashaǵynyń jarqyn bolatynyna senbegen edi. Alaıda, eldiń Tuńǵysh Prezıdenti Nursultan Nazarbaevtyń sarabdal saıasatynyń arqasynda Qazaqstan tózimdilik, kelisim men gúldenýdiń sımvolyna aınaldy»,-dedi Nurlan Noǵaev.
Shara barysynda rýhanı kelisimdi nyǵaıtýǵa úles qosqandary úshin birqatar azamattar oblys ákiminiń Alǵys hattarymen marapattaldy. Olardyń arasynda: aqsaqaldar alqasynyń múshesi Gızat Súıinǵalıev, Atyraýdaǵy Apostol ákimshisi Darıýsh Býras, «Vaınah» cheshen-ıngýsh etnomádenı birlestiginiń múshesi Zelımhan Zýbarıev pen «Prıkaspııskaıa kommýna» gazetiniń qoǵamdyq-saıası bóliminiń burynǵy basshysy Lıýbov Monastyrskaıa bar.
