Atyraýda reıd kezinde 178 jasóspirim esepke alyndy
ATYRAÝ. QazAqparat - Atyraý oblystyq ІІD jergilikti polıtsııa qyzmeti ótkizgen profılaktıkalyq shara nátıjesinde 178 jasóspirim esepke alyndy, dep xabarlaıdy QazAqparat tilshisi.
Balasyn mektepke jibergisi kelmeıtin nemese balanyń bos ýaqytyn durys ótkizýge jete mán bermeıtin otbasylarmen jumys udaıy júrgizilip keledi. Oblystaǵy jalpy profılaktıkalyq esepte 203 jaısyz otbasy tur. Jyl basynan beri jasóspirimderdiń qatysýymen 1500-ge jýyq tártip buzýshylyq tirkelgen.
«Ata-analardyń jaýapkershiligi QR ÁQBtK-niń 442-babynda kózdelgen. Atalmysh zań aıasynda mektep jasyndaǵy balalardyń bilim men tárbıe alýyna erekshe kóńil bólinedi», -deıdi oblystyq ІІD bastyǵynyń orynbasary, polıtsııa polkovnıgi Berik Amangeldi.
Al, jergilikti polıtsııa qyzmetiniń aǵa ınspektory, polıtsııa podpolkovnıgi Oryngúl Kóshqalıevanyń aıtýynsha, 1600-ge jýyq ata-anaǵa qatysty ákimshilik hattama toltyrylyp, zań talaptary túsindirilgen. Mundaı eskertýge qulaq aspaǵan 3 adam ata-ana quqyǵynan aıyrylyp, 2 tulǵanyń quqyqtary shekteldi.
Bas qosýda pikir bildirgen úkimettik emes uıym músheleri otbasynda zorlyq kórgen analardyń quqyqtarynyń qorǵalýy jáne bul rette ishki ister organdarynyń belsendiligin odan ári arttyrý jaıyndaǵy oılarymen bólisti.
