Atyraýda restobarda boıjetkendi urǵan kúzetshilerge qatysty tergeý bastaldy
Boıjetken Instagram-paraqshasynda jazǵandaı, restobardyń kúzetshileri onymen tanysýǵa talpynys jasaǵan. Biraq, ol bul usynystan bas tartqan. Sodan keıin kıkiljiń bastalǵan.
«Kúzetshiler telefonmen sóılesýge shyqqan meni qaıtadan kirgizbeı qoıdy. Olar maǵan kúsh kórsetti. Betimnen birneshe ret uryp, jerge qulatty. Sol kezde meni urǵan kúzetshi basymnan tepti. Polıtsııaǵa shaǵym túsirdim. Biraq, vıdeojazbaǵa eki kúnnen keıin ǵana qol jetkizdik», - deıdi zardap shekken boıjetken.
Atyraý oblystyq Polıtsııa departamentiniń baspasóz qyzmetinen málim etkendeı, atalǵan derekke qatysty sotqa deıingi tergeý bastaldy.
«Atyraý qalasyndaǵy restobarlardyń birinde azamatshany uryp-soǵý deregine qatysty QR Qylmystyq kodeksiniń 293-baby 2-bóligimen sotqa deıingi tergeý amaldary júrgizilip jatyr. Kúdiktiler anyqtaldy. Jábirlenýshige sot-medıtsınalyq saraptama taǵaıyndaldy. Ózge aqparat Qylmystyq-protsestik kodekstiń 201-babyna sáıkes jarııalaýǵa jatpaıdy», - dep málim etti departamenttiń baspasóz qyzmetinen.
Eske salaıyq, buǵan deıin Atyraýda bolǵan ózge oqıǵa jóninde jazǵan edik. Bes jigit kópqabatty turǵyn úıdiń aldynda tóbelesken. Olar ýchaskelik polıtsııa qyzmetkerleriniń talabyna baǵynbaı, qarsylyq tanytqan.
Ýchaskelik polıtsııa ınspektorlary 32-38 jastaǵy jigitterge qatysty QR Ákimshilik quqyq buzýshylyq týraly kodeksiniń 434-babynyń 1, 2-bólimderimen, 667-babynyń 1-bólimimen ákimshilik hattama toltyrdy. Jınaqtalǵan is qujattary sotqa joldandy. Sot sheshimimen kinálilerge 5 kúnnen 20 kúnge deıin ákimshilik qamaýǵa alý jazasy taǵaıyndaldy.
