Atyraýda respýblıkalyq kúıshiler baıqaýy ótti
ATYRAÝ. QazAqparat - Atyraýda kúıshi Ázıdolla Esqalıev atyndaǵy «Altyn dombyra» IV respýblıkalyq kúı baıqaýy ótti. Baıqaýda Qazaqstannyń ártúrli óńirinen kelgen 19 ónerpaz baǵyn synady, dep habarlaıdy «QazAqparat» HAA tilshisi.
Saıystyń qorytyndysy boıynsha, baıqaýdyń bas júldesi jáne 1 mıllıon teńgelik sertıfıkat D.Nurpeıisova atyndaǵy xalyqtyq mýzyka akademııasy Atyraý mýzyka kolledjiniń ustazy Jánibek Jámıevke buıyrdy.
I oryn jáne 700 myń teńgelik aqshalaı syılyq Qurmanǵazy atyndaǵy qazaq ulttyq konservatorııasynyń 4 kýrs stýdenti Asylbek Dáýletııarovqa berildi. II oryndy jáne 500 myń teńgelik sertıfıkatty Qurmanǵazy atyndaǵy qazaq ulttyq konservatorııasynyń 2 kýrs stýdenti Aqbóken Temir men D. Nurpeıisova atyndaǵy akademııalyq qazaq xalyq aspaptar orkestriniń ártisi Rınat Ǵımyranov ıelendi.
Júldeli III oryndy Qurmanǵazy atyndaǵy qazaq ulttyq konservatorııasynyń stýdentteri Ánýar Zınedenov, Álibı Nyshan jáne Áıgerim Netalıevalar teń bólisti. Olardyń árqaısysy 300 myń teńgelik sertıfıkatqa ıe boldy. Baıqaýdyń dıplomanttaryna 100 myń teńgeden aqshalaı syılyqtar tabystaldy.
«Elimizge eńbegi sińgen kompozıtor Ázıdolla aǵa qazaq mýzykasynyń damýyna úlken úles qosty. Ol mýzyka qoǵamynda joǵary abyroıǵa ıe boldy jáne halyqtyń ystyq yqylasyna bólendi. Mundaı sharalar qoǵamnyń rýhanı jańǵyrýy jáne ósip kele jatqan urpaq úshin úlken mánge ıe», - dedi Atyraý oblysynyń ákimi Nurlan Noǵaev.
QR Halyq ártisi, «Qurmet» ordeniniń ıegeri, búkilodaqtyq oryndaýshylar baıqaýynyń laýreaty, professor Ázıdolla Esqalıev sheber oryndaýshy retinde birneshe dúrkin xalyqaralyq baıqaýlardyń laýreaty, búkildúnıejúzilik festıvalinde qazaqstandyq ónerpazdar arasynda birinshi bolyp «Altyn medaldy» ıelengen. QR Halyq ártisi Qurmanǵazy atyndaǵy konservatorııanyń professor-ustazy retinde Qarshyǵa Axmedııarov, Aıtqalı Jaıymov, Aıgúl Úlkenbaeva syndy dombyrashylar urpaǵyn tárbıelep shyǵarǵan.
