Atyraýda respýblıkalyq bıýdjetten bólingen 13 mlrd 728 mln teńge qysqartylǵan
Bul týraly oblys ákimi Serik Shápkenovtiń tóraǵalyǵymen ótken respýblıkalyq bıýdjet esebinen bólingen qarjynyń ıgerilýine qatysty jıynda belgili boldy.
Oblystyq ekonomıka jáne bıýdjettik josparlaý basqarmasynyń basshysy Aıgúl Ájiǵalıevanyń málimetinshe, respýblıkalyq bıýdjetten bólingen transfertterdiń josparyna túzetý engizilgen. Jumys kóleminiń tolyq oryndalmaýyna baılanysty 13 mlrd 728 mln teńge qysqartylǵan.
«Bıylǵy jyldyń qorytyndysymen ıgerilmeıtin respýblıkalyq bıýdjetten bólingen transfertter bar. Bular – Qyzylqoǵa aýdanynyń Tasqudyq, Sorkól, Saryqumaq, Bylqyldaqty, Qońyraýly, Kenbaı eldi mekenderinde gaz qubyry jelilerin salýǵa 500 mln teńge, Mahambet aýdanyndaǵy Jaıyq ózeniniń jaǵalaýyn nyǵaıtýǵa 1 562 732 myń teńge, Atyraý qalasynyń Talǵaıran aýylyndaǵy turǵyn úılerdiń ınjenerlik júıelerine 1 800 526 myń teńge, Inder aýdanynda turǵyn úılerdiń ınjenerlik júıelerine 245 506 myń teńge», -dedi Aıgúl Ájiǵalıeva.
Oblys ákimi Serik Shápkenovtiń pikirinshe, bıýdjetti josparlaýda kemshilikter bolǵan. Al, jobalardy iske asyrý kezinde tártip tómen deńgeıde bolyp otyr.
«Memleket basshysynyń tapsyrmasyna sáıkes, Atyraý oblysyn áleýmettik-ekonomıkalyq damytý týraly keshendi jospar jasaqtalyp, qarajat bólindi. Alaıda, jumystyń júrgizilmeýine baılanysty bólingen qarjyny keri qaıtardyq. Bul – bizge syn. Eshkimdi qorqytyp jumys istetpeımiz. Eger merdiger mekeme kelisilgen grafıkten tys qalsa, zań aıasynda kelisimshartty buzý kerek. Memlekettiń qarajatyn jymqyrǵan merdigerler zań aldynda jaýap berýi tıis. Birde-bir memlekettik qyzmetshi olardy arashalaýshy bolmasyn», -dedi Serik Shápkenov.
Eske sala ketelik, buǵan deıin Atyraýda aýdan ákimdigi úı qurylysy bitpese de, merdigerge 330 mln teńgeni aýdaryp jibergenin, keıin Atyraý oblysynda mektepti jóndeý kezinde 20 mln teńgeniń jumysy atqarylmaǵan jazǵan edik.