Atyraýda Reseımen shekaradaǵy aýdanda qutqarý beketi ashyldy
ATYRAÝ. QazAqparat – Atyraý oblysynyń Reseıdiń Astrahan óńirimen shekaralas Qurmanǵazy aýdanynda qutqarý beketi ashyldy, dep habarlaıdy QazAqparat.
Oblystyq Tótenshe jaǵdaılar departamentiniń bastyǵy, azamattyq qorǵaý polkovnıgi Omar Berjanovtyń aıtýynsha, buǵan deıin Qurmanǵazy aýdanynda qutqarý bólimshesi bolmaǵan.
«Qurmanǵazy aýdany oblys ortalyǵynan 230 shaqyrym qashyqta ornalasqan. Munda qutqarý bólimshesi bolmaǵandyqtan, tótenshe jaǵdaılar týyndaǵan kezde Atyraý qalasynan qutqarýshylardyń aýdanǵa jedel jetýi qıyn edi. Endi mine, aýdan turǵyndarynyń qaýipsizdigin qamtamasyz etetin qutqarý beketi ashylyp otyr» - deıdi Omar Berjanov.
Qutqarý beketinde kezekshilikti uıymdastyrý barlyq jaǵdaı qarastyrylǵan. Demalys bólmeleri men ashanasy, qutqarýshylardyń kásibı daıyndyǵyn arttyrýǵa arnalǵan oqý synyby bar.
«Qutqarý beketiniń qyzmetkerleri tek jazda sý aıdyndarynda ǵana emes, jyl boıy kómekke kelýge daıyn bolady. Sol sebepten, qutqarý beketine jol talǵamaıtyn markaly avarııalyq-qutqarý qural-saımandarymen jabdyqtalǵan 2 «ÝAZ», 2 júzý qaıyǵy, súńgýir-qutqarý jabdyqtary men baılanys quraldary bólindi» -deıdi B.Omarov.
Eske sala ketelik, budan buryn Atyraý oblysynda Reseımen shekaradaǵy aýylda jedel járdem beketi ashylǵanyn jazǵan bolatynbyz.
