Atyraýda Reseıde tirkelgen kólik júrgizýshisi adam qaǵyp, mert qyldy
ATYRAÝ. QazAqparat – Atyraýda Reseıde tirkelgen kólik qaqqan er adam oqıǵa ornynda mert boldy, dep habarlaıdy QazAqparat.
Atyraý oblystyq Polıtsııa departamenti baspasóz qyzmetiniń málimetinshe, jol-kólik oqıǵasy keshe, 10 qarashada saǵat 20:00 shamasynda bolǵan.
«Atyraý qalasyndaǵy S.Beıbarys dańǵylymen H.Dospanova atyndaǵy halyqaralyq áýejaıǵa bara jatqan «Kia Serato» kóligi jaıaý júrginshiler ótkelinde adam qaǵyp ketken. Jol-kólik oqıǵasynan 1981 jylǵy er adam oqıǵa ornynda qaza tapty. Atalǵan kóliktiń Reseı Federatsııasynda tirkeýde turǵany anyqtaldy», - dep málim etti departamenttiń baspasóz qyzmetinen.
Reseılik kóliktiń rýlinde bolǵan 28 jastaǵy júrgizýshi ustaldy. Kólik arnaýly turaqqa qoıyldy. Qazir atalǵan jol-kólik oqıǵasyna baılanysty is-qujattar jınaqtalýda.
Buǵan deıin habarlaǵanymyzdaı, oblysta bıylǵy 10 aıda shetelde tirkelgen kólikterdiń qatysýymen bolǵan jol-kólik oqıǵalarynda 17 adam qaza tapty. Al, 75 adam dene jaraqattaryn aldy. Osy kezeńde sheteldik tirkeýde turǵan avtokólikter 4 096 márte jol júrý erejesin buzǵan. Sondaı-aq Atyraý óńirine Reseıden 100-den astam kólik jalǵan qujatpen ákelingeni belgili boldy.
Al QR ІІM Ákimshilik polıtsııa komıteti tóraǵasynyń orynbasary Serik Túsipovtiń málimetinshe, Qazaqstanda jol erejesin jıi buzatyn júrgizýshilerdiń 20 paıyzy - sheteldik kólik ıeleri.
