Atyraýda renovatsııadan ótetin 237 úıdiń 70 paıyzy qurylys normalaryna sáıkes kelmeıdi
Atyraý qalasynyń ákimi Meıirim Qalaýıdyń málimetinshe, 237 eski úıdi renovatsııadan ótkizý josparlanǵan. Onda 3 674 páter ornalasqan.
«Munaıly shahardaǵy tozyǵy jetken, eski turǵyn úı qory renovatsııaǵa jatatyn kúrdeli áleýmettik másele retinde qarastyrylyp otyr. Eski úıler qaladaǵy M.Baımuhanov, M.Áýezov, S.Datov kósheleri men Azattyq dańǵylynda ornalasqan. Mundaı turǵyn úılerdiń 70%-dan astamy qurylys normalary men erejelerine, sanıtarlyq talaptarǵa sáıkes kelmeıdi. Sol sebepten, 2011-2020 jyldarǵa arnalǵan Atyraý qalasyndaǵy jańǵyrtý baǵdarlamasy aıasynda jalpy aýdany 610 787,3 sharshy metrdi quraıtyn 149 úıge kúrdeli jóndeý júrgizildi. Al, 2012-2021 jyldary Atyraý qalasynyń aýmaǵyndaǵy jalpy aýdany 34 069 sharshy metrlik 37 úı buzyldy. Eski úılerdi meken etken 1 356 otbasy jalpy aýdany 39 700 sharshy metr bolatyn jańa páterlerge kóshirildi», -deıdi Meıirim Qalaýı.
Qala ákiminiń aıtýynsha, bıyl termojańǵyrtý jobasymen kópqabatty 27 turǵyn úıge kúrdeli jóndeý jumystaryn júrgizý josparlanyp, memlekettik saraptamadan ótkizilgen.
Osy kezge deıin 15 úıge kúrdeli jóndeý júrgizilgen. Jyl sońyna deıin taǵy 12 úıdi kúrdeli jóndeý jumystaryn aıaqtaý josparlanǵan.
Eske sala ketelik, budan buryn Atyraýda aldaǵy bes jylda kópqabatty 237 eski úı renovatsııadan ótetinin jazǵan edik.