Atyraýda PTR test nátıjeleri keshiktirilip jatyr
ATYRAÝ. QazAqparat – Atyraýda PTR test nátıjeleri keshiktirilip jatyr. Onyń sebebin oblystyq densaýlyq saqtaý basqarmasy basshysynyń orynbasary Gúlnafıs Tańbaeva túsindirip berdi, dep habarlaıdy QazAqparat.
Gúlnafıs Tańbaevanyń málim etýinshe, naýryz aıynan beri COVID-19 ınfektsııasyn anyqtaý úshin aımaqta 20 238-nan asa test synamasy alynǵan.
«Búginge deıin Atyraý oblysyna 29 620 PTR test alyndy. Koronavırýs ınfektsııasyn anyqtaý úshin 20 238 ret test jasaldy. Qazirgi ýaqytta testileý nátıjesiniń merzimi keshiktirilip jatqany týraly shaǵymdar kóptep túsýde. Osy oraıda, azamattarǵa zerthanalarda alynǵan barlyq synamalardy óńdeýge ýaqyttyń tapshy ekenin aıtqym keledi. Mamandar táýlik boıy jumys isteýde. Ókinishke oraı, Ulttyq saraptama ortalyǵy qyzmetkerleriniń 90 paıyzy koronavırýs ınfektsııasyn juqtyryp, qazir olar tıisti em qabyldaýda. Barlyǵynyń da otbasy, qart ata-anasy, týystary bar. Sondyqtan, turǵyndardan bolyp jatqan jaǵdaılarǵa túsinistikpen qaraýyn suraımyn», - dedi Gúlnafıs Tańbaeva.
Onyń aıtýynsha, keshe TShO kompanııasy men oblystyq densaýlyq saqtaý basqarmasy PTR apparatyn Kaspıı medıtsınalyq jeke klınıkasynyń balansyna berý týraly kelisim jasasty. Zerthananyń tolyqqandy jumys isteýi úshin qajetti jaǵdaılardyń barlyǵy qarastyrylǵannan keıin, jýyq arada emhanadan koronavırýsqa test tapsyryp, nátıjesin alýǵa bolady. Al, qazirgi ýaqytta PTR synamalaryn óńdeýmen «Invivo» medıtsınalyq zerthanasy aınalysyp jatyr.
Eske sala ketelik, budan buryn Atyraýda Ulttyq saraptama ortalyǵy fılıalynyń dırektory men 13 qyzmetkeri koronavırýs juqtyrdy.
