Atyraýda psıhotropty dárilik zat satqan sheteldik áıel ustaldy
Oblystyq polıtsııa departamenti baspasóz qyzmetiniń aqparatyna qaraǵanda, Ózbekstan Respýblıkasynyń 22 jastaǵy azamatshasy psıhotropty dárilik zat satýmen aınalysyp kelgen.
«Esirtkige qarsy is-qımyl basqarmasynyń qyzmetkerleri «Qarasora – 2021» jedel-profılaktıkalyq is-sharasy kezinde Jumysker shaǵyn aýdanyna esirtkige uqsas zat jasyryp ketken ózbekstandyq 22 jastaǵy áıeldi anyqtady. Keıin sheteldik áıel ustaldy. Kúdiktiniń jasyrǵany «Alfa-PVP» psıhotropty dárilik zaty ekeni belgili boldy. Sheteldik áıel ony «Telegramm» jelisi arqyly satyp alǵanyn moıyndady» -deıdi oblystyq polıtsııa departamentiniń basshysy, polıtsııa polkovnıgi Qamza Úmbetqalıev.
Qazir ustalǵan kúdiktige qatysty QR Qylmystyq kodeksiniń 296-babynyń 2-bóligimen sotqa deıingi tergeý amaldary júrgizilýde. Ózge aqparat QR Qylmystyq-protsessýaldyq Kodeksiniń 201-babyna sáıkes jarııalanýǵa jatpaıdy.
Eske sala ketelik, buǵan deıin Atyraýda esirtki tasymaldaǵan sheteldik qamaýǵa alynǵanyn jazǵan edik.