Atyraýda provızorlyq statsıonarǵa 20 sport dárigeri kómekke keldi
ATYRAÝ. QazAqparat – Atyraýdaǵy provızorlyq statsıonarǵa 20 sport dárigeri kómekke keldi, dep habarlaıdy QazAqparat.
Atyraý oblysynyń ákimi Mahambet Dosmuhambetov oblystyq aýrýhana janyndaǵy provızorlyq statsıonarǵa kómekke kelgen oblystyq sport basqarmasynyń 20 medıtsına mamany jáne qalanyń erikti jastarymen kezdesý ótkizdi.
Qazir óńirde 278 medıtsına mamany jetispeıdi. Jyldar boıy sheshimin tappaǵan bul olqylyqtyń ornyn toltyrý úshin jergilikti ákimdik shuǵyl sheshimder qabyldaýda. Endi mine, Atyraý oblysynyń 20 sport dárigeri budan bylaı qaýipti indetpen kúreske jumyldyrylady.
«Qaýipti aımaqta qoldan keletin kómekti kórsetip júrsizder. Kıslorodty balon tasymaldaý ońaı jumys emes. Qazir adamdar ystyqtan qınalyp júrgen kezde sizder osyndaı aýyr eńbekti atqaryp jatyrsyzdar. Bıyl elimizde volonterler jyly bolyp jarııalandy. Sizderdiń kómekterińiz dál ýaqytynda jasalýda. El úshin, jurt úshin, Atyraý óńiriniń turǵyndary úshin atqaryp jatqan eńbekterińiz - úlken kómek. Bir-birimizge járdemdesý, kómektesý arqyly bul indetti de jeńemiz», - dedi oblys ákimi Mahambet Dosmuhambetov.
Eki aptadan astam ýaqyttan beri kómek kórsetip júrgen volonter Mıra Esnııazova bastapqyda syrtqy jumystardy jasaýǵa ǵana nıettengenin aıtady.
«Qaýipti aımaqqa kiremiz degen oı bolǵan joq. Biraq, naýqastarǵa ottegi balony kerektigin estidik. Jigitterimiz qorǵanys kıimderin kıip, provızorlyq ortalyqqa kirip ketti. Keıin biz de atsalysa bastadyq. Qazir el úshin qıyn kezeńde qarap otyra almaımyz. Birlesý arqyly, bir-birimizge kómek jasaý arqyly qıyndyqty eńseretinimizge senemin» deıdi ol.
Eriktiler jumysynyń aýqymdy bóligin oblys ákimdigine qarasty Azamattyq ortalyq úılestirip otyrady.
Buǵan deıin Atyraýǵa Reseıdiń Astrahan oblysynan bes dáriger kelgen edi.
