Atyraýda prokýrorlar náreste ólimine qatysty isti tekserip jatyr

ATYRAÝ. QazAqparat – Atyraý qalasynyń prokýratýrasy nárestelerdiń shetineý deregi boıynsha sotqa deıingi tergep-tekserýdi bastady, dep habarlaıdy QazAqparat tilshisi.

«Qyzmettik tekseris barysynda jáne tıisti sarapshylardyń qorytyndysy negizinde dárigerler jańa týǵan nárestelerdiń janyn saqtap qalýǵa múmkindigi bolǵan jaǵdaılar anyqtaldy. Atap aıtqanda, №3 qalalyq emhanasynyń qyzmetkerleri kelinshek bosanarda kásibı mindetterin jóndi atqarmaǵan. Sonyń saldarynan bıyl 13 aqpan kúni jańa týǵan náreste shetinegen. QR Qylmystyq kodeksi 317-baby 3-bóligine sáıkes sotqa deıingi tergep-tekserý bastaldy. Іs oblystyq polıtsııa departamentiniń óndirisinde», - dep málimdedi Atyraý oblysy prokýrorynyń aǵa kómekshisi Qanat Qabdolov.

Onyń aıtýynsha, osy qylmystyq isti tekserý oblys prokýrorynyń qatań qadaǵalaýynda.
«№4 jáne №5 qalalyq emhanalarynda da 5 kelinshek bosanar kezde osyndaı jaǵdaılar boldy. Osy derekter qala prokýratýrasynyń tirkeýine engizildi ári protsessýaldyq sheshimderdi qabyldaý úshin qalalyq polıtsııa basqarmasyna jiberildi», - dedi Qanat Qabdolov. Aıta keteıik, Atyraý oblystyq perınataldyq ortalyǵynda bıyl 5 046 sábı dúnıege kelgen. 56 bala týa salyp shetinese, 77 bala anasynyń jatyrynda mert bolǵan.