Atyraýda prokýrorlar medıtsınalyq qyzmet baǵalaryn tómendetti
«Zańdylyqty tekserý jáne medıtsınalyq qyzmet baǵalaryn qalyptastyrý qanshalyqty negizdi degen másele tóńireginde monıtorıng júrgizgen Atyraý prokýratýrasy qala emhanalarynyń beriletin anyqtama baǵalaryn joǵarylatqanyn anyqtady. 086ý jáne 083ý formaly medıtsınalyq anyqtamalardy berý qyzmetteriniń baǵasyn anyqtaý kezinde shyǵyndar statıasyna mamandardyń jalaqysy jáne basqa da shyǵyn túrleri negizsiz engizilgen. Prokýrorlyq áreket etý aktisin qarastyrý qorytyndylary boıynsha, 086ý jáne 083ý formaly medıtsınalyq anyqtamalardy berý memlekettik qyzmeti eki ese - 7990 teńgeden 3875 teńgege deıin jáne 5070 teńgeden 2810 teńgege deıin tómendetildi», - dep habarlady oblystyq prokýratýranyń baspasóz qyzmetinen.
Memlekettik qyzmet túrlerine baǵa belgileýde uqsas jaǵdaı Atyraýdaǵy psıhıalyq densaýlyq saqtaý ortalyǵynda da bolǵan. Qadaǵalaý aktisi boıynsha munda esepke alý jaǵdaıy týraly anyqtama baǵasy 1200 teńgeden 1000 teńgege deıin, kólikti basqarýǵa, qarý ustaýǵa ruqsat anyqtamalary 3500 teńgeden 3100 teńgege deıin tómendedi. Osylaısha, oblystyq prokýratýra memlekettik qyzmet baǵalaryn ósirýdiń zańsyz tájirıbesin toqtatyp, sol arqyly kóp azamattardyń quqyǵyn qorǵap qaldy.