Atyraýda probatsııa esebinde turǵan adamdar jeke kásibin ashqan
Atyraý oblysy boıynsha Qylmystyq-atqarý júıesi departamentiniń probatsııa qyzmeti esebindegi 5 sottalýshy «Bastaý-Bıznes» kásipkerlik negizderin oqytý jobasynyń kýrsyn aıaqtap, jeke kásibimen aınalysýda. Máselen urlyq, tonaý jáne alaıaqtyq babymen sottalǵan 3 jas jigit bıznes-ıdeıasyn júzege asyrý úshin memleketten 555 myń teńgeniń grantyn utyp alǵan. Olar bul qarjyny jeke kásibin ashýǵa jumsamaq.
«Qazir Atyraý qalalyq probatsııa qyzmetiniń esebinde turǵan taǵy bir sottalýshy kólik jýý ortalyǵyn ashyp, kásibin dóńgeletýde. Al Inder aýdandyq probatsııa qyzmetiniń esebindegi sottalǵan azamat aýdan ortalyǵynan fast-fýd dúńgirshegin ashty», - dep habarlaıdy Atyraý oblysy boıynsha Qylmystyq-atqarý júıesi departamentiniń baspasóz qyzmeti.
Atyraý qalalyq jáne aýdandyq probatsııa qyzmetimen sottalǵandar arasynda jeke bıznesterin ashýǵa arnalǵan semınar-trenıngter ótkizilýde. Sottalýshylarǵa áleýmettik-quqyqtyq kómekter kórsetilip otyr.
