Atyraýda polıtsııadan qashqan júrgizýshi aıyppul tólep, bir aıǵa qamaldy
ATYRAÝ. QazAqparat –Atyraýda polıtsııa qyzmetkerleriniń toqtaý týraly talabyn oryndamaı qashqan «Mercedes Benz» avtokóliginiń júrgizýshisi 30 táýlikke qamaýǵa alyndy, dep habarlaıdy QazAqparat.
Atyraý oblysynyń Bas sanıtarlyq dárigeriniń qaýlysyna sáıkes, qalada keshki saǵat 21:00-den keıin jaıaý júrginshiler men avtokólikterdiń júrýine tyıym salynǵan. Osyǵan oraı polıtsııa qyzmetkerleri túnde sebepsiz júrgenderdi anyqtap, toqtatý úshin reıdke shyqqan.
«Máselen, 12 sáýir kúni keshki saǵat 21:20 shamasynda polıtsııa basqarmasynyń «Batys 25» ekıpajymen Atyraý qalasyndaǵy Sátbaev-Pýshkın kósheleri qıylysynda ketip bara jatqan «Mercedes Benz» avtokóligi anyqtaldy. Ekıpaj qyzmetkerleri toqtatpaq bolǵanmen, kólik júrgizýshisi talapty oryndamady. Daýys zoraıtqysh arqyly birneshe ret qaıtalaǵannan keıin júrgizýshi kóligin Qulmanov kóshesi boıyndaǵy «Atyraý» saýda ortalyǵy tusynda toqtatqan. Júrgizý qujaty joq azamat medıtsınalyq saraptama qorytyndysymen «orta» dárejeli mas kúıinde ekendigi de anyqtaldy», - dep habarlady oblystyq Polıtsııa departamentiniń baspasóz qyzmetinen.
Oǵan qatysty QR Ákimshilik quqyqbuzýshylyq týraly kodeksiniń 4 birdeı babymen ákimshilik hattamalar toltyrylyp, sotqa joldandy. Atyraý qalasynyń mamandandyrylǵan ákimshilik sotynyń qaýlysymen atalǵan kodekstiń 601-babymen (Jol belgisi talabyn oryndamaý) 4167 teńge mólsherinde aıyppul, 613-babymen (Polıtsııa qyzmetkeriniń avtokólikti toqtatý talabyn oryndamaý) 41 670 teńge mólsherinde aıyppul salý, 608-bappen (Júrgizý quqyǵy joq, alkogoldik ishimdik ishken masaıý kúıde avtokólikti basqarý) 20 táýlikke qamaýǵa alý, 478-bappen (Tótenshe jaǵdaı rejımi kezinde polıtsııa qyzmetkerleriniń zańdy talabyn oryndamaý) 10 táýlik qamaýǵa alý belgilengen.
Qorytyndysynda Atyraý qalasynyń 34 jastaǵy turǵynyna 45 837 teńge mólsherinde aıyppul salynyp, 30 táýlikke ákimshilik qamaýǵa alyndy.
Sondaı-aq, qazirgi ýaqytta Atyraý oblystyq Polıtsııa departamentiniń ózindik qaýipsizdik qyzmeti «Batys 25» ekıpajynyń qyzmetkerleriniń quqyq buzýshyny ustaý kezindegi zańdylyqtyń saqtalýyna qatysty qyzmettik tergeýdi júrgizip jatyr.
