Atyraýda polıtsııa podpolkovnıgi men maıorynyń jemqorlyqtary áshkerelendi
Sheneýnikterdiń ustalǵany týraly málimet Memlekettik qyzmet isteri jáne sybaılas jemqorlyqqa qarsy is-qımyl agenttiginiń Feısbýk paraqshasynda jarııalanyp otyr. Belgili bolǵandaı, sybaılas jemqorlyqqa qarsy qyzmet Atyraý qalalyq ishki ister basqarmasy basshysynyń orynbasary, polıtsııa podpolkovnıgi jáne osy basqarmanyń kóshi-qon qyzmeti bóliminiń aǵa ınspektory, polıtsııa maıoryna qatysty sotqa deıingi tergeý júrgizip jatyr.
«Kúdiktiler shetel azamattaryna jumys isteýge ruqsattamany kedergisiz jáne jyldam berý úshin osy jyldyń mamyr-tamyz aılarynda júıeli negizde para alyp otyrǵan. Kedergisiz jáne jyldam tirkeý jáne eńbek etýge ruqsattama berý úshin Ózbekstan Respýblıkasynyń azamattarynan aqsha qarajaty jáne taýarlyq-materıaldyq qundylyqtar túrinde alynǵan paranyń jalpy somasy 213 myń teńgeni quraǵan» delingen jazbada.
Tintý barysynda 80-nen astam shetel azamatynyń pasporty jáne 600 myń teńge somasyndaǵy aqsha qarajaty tabyldy. Qazirgi tańda olardyń paıda bolý zańdylyǵy jáne qylmystyq is materıaldaryna qatysy anyqtalýda. Kúdiktiler para alý faktilerin tolyq moıyndaýyna baılanysty qamaýǵa alynbaǵan.
ІІB qyzmetkerlerimen birge, Atyraý qalalyq memlekettik kirister basqarmasy Májbúrli óndirý bóliminiń basshysyna da qatysty tergeý bastaldy. Ol kásipkerlerden anyqtalǵan salyqtyq buzýshylyqtardy kórsetpeı, kásipkerlik qyzmetti zańsyz toqtatý úshin aqsha bopsalaý arqyly júıeli túrde paraqorlyqpen aınalysty dep kúdikke ilinip otyr.
«Júrgizilgen jasyryn tergeý is-áreketteri nátıjesinde 6 qyrkúıek kúni saǵat 14.30-da Atyraý qalalyq memlekettik kirister basqarmasynyń bólimi basshysy salyq beresheginiń bar ekendigi týraly eskertýdi kórsetpeý, jeke kásipker qyzmetin toqtatý, shotty jappaý jáne shaǵyn bıznes qyzmetine jalpy qamqorlyq jasaý úshin jeke kásipkerden 60 myń teńge kóleminde para alý ústinde áshkerelendi. Sol kúni birinshi parany alǵannan keıin nebary 10 mınýt ótken soń saǵat 14.40-ta kúdikti jeke kásipker ókilinen bopsalaýshylyq arqyly 10 myń teńge kóleminde para alǵan. Kúdikti para alý faktilerin tolyǵymen moıyndady» delingen habarlamada.