Atyraýda polıtsııa osy aptada úshinshi ret bomba izdedi

ATYRAÝ. QAZaQPARAT – Atyraý polıtsııasy osy aptada úshinshi ret jarylǵysh zatty izdedi, dep habarlaıdy QazAqparat.

Atyraýlyq arnaıy qyzmetterge dúısenbiden beri úshinshi ret jarylǵysh zat qoıylǵany týraly habar túsken.

Búgin, 26 sáýirde arnaıy qyzmet ókilderi H.Dosmuhamedov atyndaǵy Atyraý ýnıversıtetine jarylǵysh zat izdep jatyr.

Osyǵan baılanysty oqý korpýstarynan oqytýshylar men stýdentter qaýipsiz jerge shyǵaryldy.

Buǵan deıin 24 sáýirde ARES joǵary kolledjine de jarylǵysh zat qoıylǵany habarlanǵan edi.

Alaıda, atalǵan oqý ornynan bomba tabylǵan joq.

Sol kúni keshki mezgilde «Dına» saýda ortalyǵynan jarylǵysh zat izdedi. Biraq, aqparat jalǵan bolyp shyqqan.

«Oblystyq polıtsııa departamentine H.Dosmuhamedov atyndaǵy Atyraý ýnıversıteti men qaladaǵy kolledjderdiń birinde kúdik týdyrǵan sómke bar degen habar tústi. Atyraýlyq polıtseıler aqparatty tekserý úshin ǵımarattardaǵy adamdardy evakýatsııalap, tekserý júrgizdi. Aqparattyń jalǵan ekendigi anyqtaldy. Qazir tergeý amaldary bastalyp ketti. Aıta keteıik, kórineý jalǵan aqparat taratý deregi boıynsha QR Qylmystyq kodeksiniń 273-babyna sáıkes jaýapkershilik kózdelgen» -dep habarlady departamenttiń baspasóz qyzmeti.