Atyraýda polıtsııa men qutqarýshylar 30 jastaǵy jigitti izdeýge jumyldyryldy
ATYRAÝ. QazAqparat – Atyraýda 30 jastaǵy jigit joǵalyp ketti, dep habarlaıdy QazAqparat.
«Atyraý qalasyna taıaý ornalasqan Qaıyrshaqty aýylynynyń turǵyny, 1991 jyly týǵan Naýryz Áıtekeshov 5 aqpanda keshki mezgilde úıinen shyǵyp ketken. Ony 5 aqpanda bir úıde turatyn turǵyndar izdegen. Alaıda, 30 jastaǵy jigit áli tabylǵan joq», - dep habarlady Tótenshe jaǵdaılar departamentiniń baspasóz qyzmetinen.
6 aqpan, saǵat 18:25-ten bastap joǵalǵan azamatty izdestirýge Tótenshe jaǵdaılar departamentinen 16 qyzmetker, 7 tehnıka, 2 kınologııalyq esep, oblystyq Polıtsııa departamentinen 10 qyzmetker men 3 tehnıka jumyldyryldy.
Eske sala ketelik, buǵan deıin Atyraýda 25 jastaǵy kelinshek kishkentaı qyzymen birge joǵalyp ketip, bir kúnnen soń tabylǵan edi.
