Atyraýda polıtsııa qyzmetkeri sýǵa batqan áıeldi qutqaryp, ózi mert boldy
ASTANA. QazAqparat - Atyraýda polıtsııa sýǵa batqan áıeldi qutqaryp, óz mert boldy. Bul jaıynda QR ІІM keńesshisi - resmı ókil Nurdildá Oraz aıtty, dep habarlaıdy QazAqparat tilshisi.
21 naýryz kúni keshki saǵat 21-52-de «102» pýltine belgisiz adam habarlasyp, ortalyq kópirden bir adamnyń sýǵa sekirgenin habarlady. Atyraý qalalyq polıtsııa basqarmasynyń jeke quramy shuǵyl arada qulaqtandyryldy. Oqıǵa ornyna birinshi jetken patrýldik polıtsııa serjany Shalqar Aqymǵalıev oılanbastan muzdaı sýǵa túsken.
«Jaǵalaýda rolıkpen serýen degennen keıin demalyp almaq bolǵan kezimizde sýıtsıdke tosynnan kýá boldyq. Men birden polıtsııaǵa habarladym. Sanaýly sekýndtar ishinde oqıǵa ornyna jetken polıtsııa qyzmetkerleriniń biri batyp bara jatqan adamǵa tez júzip bardy. Sý muzdaı, oǵan qosa qatty aǵys qyzdy qalaı aǵyzyp bara jatqany da kórinip turdy. Biraq, polıtsııa qyzmetkeri óz ómirin táýekelge tigip, batqan adamdy qutqarýǵa talpynysyn toqtatqan joq», - deıdi oqıǵa kýágeri Raıymbek Sarbalın.
Shalqarǵa kómekke ózimen birge bóreneni alyp sýǵa túsken polıtsııa kishi leıtenanty Rústembek Súndetov umtylǵan.
«Sýǵa batqan adamǵa jetken kezimde Shalqar aǵysqa tótep bere almaı batyp ketti. Áıeldi qutqarý mańyzdy boldy. Onyń ústine áıel «ol men úshin óldi» dep aıqaılap, esti shyǵardy», - dep eske alady Rústembek Súndetov.
Ajaldan qutqarylǵan Batys Qazaqstan oblysynyń týmasy jedel járdem kóligimen oblystyq aýrýhanasynyń reanımatsııa bólimshesine jetkizilgen. Al Rústembektiń áriptesin óz betinshe izdeýi esh nátıje bermedi. 3 gradýs muzdaı sýda sińiri tartylǵan 30 jastaǵy kishi leıtenant Súndetov jaǵaǵa ózi júzip jetken.
«00-50-de Shalqar Aqymǵalıevtiń múrdesi oqıǵa ornynan tómen jaqtan tabylyp, jaǵaǵa shyǵaryldy. Shalqar Aqymǵalıev kópbalaly otbasynyń jalǵyz asyraýshysy. Boıdaq, 1 sáýirde 25 jasqa tolatyn edi. Otanyna 5 jyl boıy adal qyzmet etip kele jatqan ol sýǵa batqan áıeldi qutqaramyn dep óz ómirin qıdy. Іshki ister organdarynyń basshylyǵy men jeke quramy qaza bolǵan azamattyń otbasy men týǵan-týystaryna qaıǵyryp kóńil aıtady», - dedi Nurdildá Oraz.
