Atyraýda polıtsııa kamera kómegimen turǵynnyń qomaqty somasy bar ámııanyn taýyp berdi
ATYRAÝ. QazAqparat – Atyraýda turǵynnyń umyt qaldyrǵan 200 myńnan astam teńgesi bar ámııanyn polıtsııa kamera kómegimen taýyp, ıesine qaıtardy, dep habarlaıdy QazAqparat.
Oblystyq Polıtsııa departamenti baspasóz qyzmetiniń málimetinshe, 27 jastaǵy azamat 200 myńnan astam teńge salynǵan ámııanyn joǵaltqanyn habarlaǵan.
«Osyǵan baılanysty jedel basqarý ortalyǵynyń qyzmetkerleri beınebaqylaý kameralary arqyly tekserý júrgizgen. Tekserý kezinde aryzdanýshynyń saǵat 11:50 shamasynda «Dına» bazarynyń janynan «Largus» markaly kóligin toqtatqany anyqtaldy. Alaıda, ol ámııanyn kóliktiń ústine qoıyp, almaı ketken. Kólik temir jol vokzaly tusyndaǵy «Nur» janarmaı beketiniń mańyna kelgende, onyń ústindegi ámııan jolǵa túsip qalǵan. Ámııandy artqa kele jatqan «Vaz-2114» markaly kóliginiń júrgizýshisi alyp ketken. Munyń bári beınebaqylaý kamerasynan anyq kórindi», - dep habarlady departamenttiń baspasóz qyzmeti.
Jedel basqarý ortalyǵynyń qyzmetkerleri «Vaz-2114» markaly kóliginiń memlekettik nómerin anyqtap, «Batys» patrýldik polıtsııa ekıpajyna baǵyttama bergen. Ekıpaj qyzmetkerleri atalǵan kólikti toqtatyp, júrgizýshisin qalalyq polıtsııa basqarmasyna jetkizgen. Kólik júrgizýshisi joldan taýyp alǵan ámııandy polıtsııa basqarmasyna jetkizbek bolǵanyn aıtqan. Sol jerde qomaqty aqshasy bar ámııan ıesine qaıtarylǵan.
«Ámııanymdy joǵaltqanymdy bilgende, abdyrap qaldym. Sodan soń polıtsııa qyzmetkerlerinen kómek suraýǵa májbúr boldym. Polıtseıler jedel áreket etip, ámııanymdy aqshasymen birge qaıtaryp berdi» -deıdi áımıany tabylǵanyna qýanǵan azamat.
Eske sala ketelik, Atyraýdyń bir turǵyny polıtsııaǵa «sýǵa sekirip, ólemin» dep jalǵan habar bergen edi.
