Atyraýda polıtsııa ınspektory qyzmettegi áreketsizdigi úshin 3 jylǵa sottaldy
Atyraý qalasynyń №2 sotynda aýyr zardaptarǵa alyp kelgen qyzmettegi áreketsizdik úshin aıyptalǵan ıývenaldy polıtsııa bólimshesiniń kámeletke tolmaǵan ister jónindegi ýchaskelik polıtsııa ınspektoryna qatysty qylmystyq is qaraldy. Oǵan QR Qylmystyq kodeksiniń 370-babynyń 4-bóligi, 1-tarmaǵymen aıyp taǵylǵan.
«Azamat N. polıtsııaǵa óziniń burynǵy jubaıynyń azamattyq nekedegi joldasy Q.-ǵa qatysty aryz túsirgen. Aryzda Q. azamat N.-nyń balalaryn urǵanyn aıtqan. Keıin osy aryz boıynsha azamat N. jáne onyń kámeletke tolmaǵan balasy, jubaıynyń azamattyq nekedegi joldasy Q. polıtsııa ýchaskesine shaqyrtylǵan. Sol jerde azamat N. men onyń kámelet jasyna tolmaǵan balasy azamat Q.-nyń úıinde tapansha qarýyn oq-dárisimen birge saqtap júrgenin aıtqan. Alaıda, ýchaskelik polıtsııa ınspektory K.R. qyzmettik mindetin adal atqarmaı, qarý saqtaý deregi jóninde habarlamaǵa nemquraılyqpen qaraǵan. Sóıtip, eshqandaı áreket jasamaı, óziniń jumysyn jeńildetý maqsatynda qyzmettik áreketsizdik tanytqan», -dep habarlady №2 sottyń baspasóz qyzmeti.
Ýchaskelik polıtsııa ınspektorynyń áreketsizdiginiń nátıjesinde Q. óziniń tapansha qarýyn zańsyz saqtap júrgeni úshin jaýapkershilikke tartylmaıtynyn sezingen. Ol sol kúni túngi saǵat 22:30 shamasynda Atyraý qalasynyń Avangard-3 shaǵyn aýdanynda zańsyz saqtap júrgen qarýymen azamattarǵa birneshe márte oq atqan. Osynyń saldarynan K., Z. jáne I. esin jımastan oqıǵa ornynda kóz jumǵan. Al N. aýyr dene jaraqattarymen Atyraý oblystyq aýrýhanasynyń jansaqtaý bólimine jetkizilgen. Qazir bul oqıǵaǵa qatysty bólek qylmystyq is qozǵalyp, sotqa deıingi tergep-tekserý júrgizilip jatyr.
Sottalýshy polıtsııa ınspektory K.R.-dyń kinási jábirlenýshilerdiń, kýálardyń aıǵaqtarymen, beınejazbalarmen dálelin taýyp otyr.
Osy iske baılanysty prokýror sottalýshy K.R.-dy ómir boıyna quqyq qorǵaý organdarynda qyzmetpen aınalysý quqyǵynan, arnaıy sheninen aıyra otyryp, 4 jylǵa bas bostandyǵynan aıyrý túrindegi jaza taǵaıyndaýdy usynǵan. Biraq, sottalýshy men onyń qorǵaýshysy taǵylǵan aıyppen kelispeı, aqtaýdy suraǵan.
«Sot K.R.-dyń qylmystyq jaýaptylyǵy men jazasyn jeńildetetin mán-jaı retinde asyraýynda jas balalarynyń baryn eskerdi. Sottalýshynyń qabyldaǵan antty buzýy jazany aýyrlatatyn jaǵdaı dep tanyldy. Sot úkimimen K.R.-ǵa ómir boıyna quqyq qorǵaý organdarynda qyzmetpen aınalysý quqyǵynan aıyra otyryp, 3 jyl merzimge bas bostandyǵynan aıyrý jazasy taǵaıyndaldy. Polıtsııa kapıtany sheninen aıyryldy», -dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik, budan buryn Atyraý oblysynda urlyqqa kúdiktini uryp-soqqan eki polıtseı sottalǵanyn jazǵan bolatynbyz.