Atyraýda polıtseılerden aqsha jınaǵan podpolkovnık jazaǵa tartyldy

ATYRAÝ. QazAqparat - Atyraýda jergilikti polıtsııa qyzmetiniń basshylary qaramaǵyndaǵy qyzmetkerlerden para alǵany úshin jazaǵa tartyldy. Bul týraly QR Sybaılas jemqorlyqqa qarsy is-qımyl agenttiginen málim boldy, dep habarlaıdy QazAqparat.

Atyraý oblysynyń sybaılas jemqorlyqqa qarsy qyzmeti budan buryn Atyraý polıtsııa basqarmasynyń jergilikti polıtsııa qyzmeti bastyǵynyń orynbasary, podpolkovnık Jumashev jáne bólimshe bastyǵy, aǵa leıtenant Baltaevqa qatysty sotqa deıingi tergeýdi aıaqtaǵan bolatyn.

Polıtseıler laýazymdyq ókilettigin teris paıdalana otyryp, qyzmette jalpy qamqorlyǵy úshin qaramaǵyndaǵylardan para alý kúdigine ilikken edi. Sonymen qatar, olar qyzmetkerlerdi eseptelgen syıaqy tólemderiniń 50 paıyzyn berýge májbúrlegen.

«Sot úkimimen olarǵa aıyppul salyndy jáne memlekettik qyzmette jumys isteý quqyǵynan ómir boıyna shettetildi. Munymen qosa, burynǵy polıtseıler arnaıy shenderinen de aıyryldy», - delingen taratylǵan málimette.

Budan buryn habarlanǵandaı, Sybaılas jemqorlyqqa qarsy is-qımyl ulttyq bıýrosy polıtsııa qyzmetkerleri arasynda zańsyz aqsha jınaý faktisin anyqtaǵan bolatyn.