Atyraýda polıtseıler órtengen úıden 3 jasóspirimdi shyǵardy
Oblystyq Polıtsııa departamentiniń baspasóz qyzmetinen málim etkendeı, búgin Maqat kentinde ornalasqan kóppáterli turǵyn úı órtengen.
Maqat aýdandyq polıtsııa bólimi bastyǵynyń birinshi orynbasary Aıymbek Qazbekov, aǵa ýchaskelik polıtsııa ınspektory Toıǵoja Azbergenov pen ýchaskelik polıtsııa ınspektory Sáken Qazturǵanov oqıǵa ornyna jedel jetken. Polıtseıler 2-qabattaǵy páterdiń terezesin syndyryp, ishine kirgen. Sóıtip, tútin tumshalaǵan páterden 3 jasóspirimdi qaýipsiz jerge evakýatsııalaǵan.
«Órtti sóndirý kóp ýaqyt alýy múmkin. Sol kezde tútin ústingi qabatqa jaıylatyny daýsyz. Sondyqtan, ústingi qabattaǵy páterlerde turǵyndardyń qalmaǵanyn qadaǵalaý qajettigin túsindik. Ýaqytty ótkizbeý úshin barynsha jedel áreket ettik. Bul – erlik emes. Biz qyzmet babyndaǵy mindetimizdi atqaryp, órt ortasynda qalǵan jandarǵa kómek berý úshin keldik», -dedi Aıymbek Qazbekov.
Departamenttiń baspasóz qyzmetiniń aqparatyna qaraǵanda, dál osyndaı oqıǵa 18 aqpanda Atyraý qalasynda da tirkelgen.
Tańǵy saǵat 05:00 shamasynda patrýldik polıtsııa batalonynyń jaıaý patrýldeý beketiniń qyzmetkerleri, polıtsııa aǵa leıtenanty Álibek Amandyq pen Asylhan Begimov kópqabatty úıde ornalasqan dúkenniń órtengenin baıqaǵan. Órt týraly jedel basqarý ortalyǵyna habarlap, ózderi jalyn sharpyǵan úıden turǵyndardy jedel shyǵarýǵa kirisken.
«Ákimshilik aýmaqty jaıaý patrýldeý kezinde dúken ishinen órt shyǵyp jatqanyn baıqadyq. Rota komandıri Dáýren Shoqpýtov pen vzvod komandıri Súıinishbek Tasımovke habarladyq. Sodan keıin turǵyndardy oıatyp, qaýipsiz jerge evakýatsııaladyq. Bul – bizdiń qyzmettik mindetimiz. Órtten turǵyndar zardap shekken joq», - deıdi Álibek Amandyq.
