Atyraýda polıtseı sýǵa batqan qyzdy qutqardy

1 shilde saǵat 23.30 shamasynda Jaıyq jaǵalaýynda qyzmet atqaryp júrgen polıtsııa leıtenanty Nurjan Ábenov pen polıtsııa serjanty Іlııas Altynbekulyna jaǵalaýdaǵy adamdardyń biri «Atyraý» DShSK mańyndaǵy ózenniń jaǵasynda uzaq ýaqyttan beri bir qyz balanyń jylap turǵanyn aıtty.

Jaıaý patrýl oılanbastan kórsetilgen tusqa baǵyt aldy. Polıtseıler oqıǵa ornyna jetkende qyz balanyń sýda turǵanyn kórdi.

«Kóńilin aýlaý úshin sýda ne istep turǵanyn suradym. Bizdi baıqaǵan ol sýdyń ortasyna qaraı jyljı bastady. Biz jaǵaǵa júgirip kelgenshe qyz ózenniń belýardan keletin tusyna deıin jetip qaldy. Polıtsııa serjanty Іlııas Altynbekuyl aıaq kıimin sheship, shalbarynyń balaǵyn qaıyrdy da, kıimsheń sýǵa tústi. Qyz daýysyn shyǵaryp aıqaılaı bastady, alaıda toqtaǵan joq. Áriptesime kómektesip, ekeýlep qyzdy jaǵaǵa shyǵardyq. Jol-patrýl polıtsııasy shaqyrtylyp, azamatsha qalalyq polıtsııa basqarmasyna jetkizildi», - deıdi Atyraý qalalyq polıtsııa basqarmasy JPQ qyzmet ınspektory Nurjan Ábenov.

Osy kezde oqıǵa kýágerleri Laýra Serikova men dostary úıge qaıtyp kele jatqan. Ol polıtsııa qyzmetkerleriniń jaǵalaý qorshaýynan sekirip, sýǵa túsip bara jatqanyn kórgen.

«Alǵashynda eshteńe túsinbedik. Bári tez boldy. Polıtseıler qyzdy jaǵaǵa alyp shyqqan kezde ǵana jaǵdaı túsinikti boldy. Polıtseıler jedel áreket etti, jaraısyńdar», - dep polıtseılerge rızashylyǵyn bildirdi ol.

Qutqarylǵan azamatshaǵa psıhologııalyq kómek kórsetilgennen keıin úıine qaıtaryldy.

Atyraýlyq polıtseıler sýǵa batqan adamdardy qutqarý, sýıtsıdke bekingenderdi raıynan qaıtarý, órtenip jatqan páterlerden azamattardy alyp shyǵý áreketterimen kózge túsip keledi. Sońǵy 2 jylda polıtseıler 11 adamdy ajaldan arashalap qalǵan.

Aıta ketelik, polıtsııa qyzmetkerleriniń is-áreketteri eleýsiz qalmady. 8 tártip saqshysy -«Erligi úshin» medalin, úsheýi «Aıbyn» ordenin ıelendi.
Sońǵy erlik qala turǵynyn sýdan qutqarý kezinde óz ómirin qıǵan Shalqar Aqymǵalıevke tıesili bolatyn.