Atyraýda polıtseı áıeldi baıqaýsyzda aıaǵynan atyp aldy
NUR-SULTAN. QazAqparat - Atyraý qalasyndaǵy halyqaralyq áýejaıda polıtsııa qyzmetkeri áıeldi baıqaýsyzda aıaǵynan atyp aldy, dep habarlaıdy QazAqparat Kóliktegi polıtsııa departamentiniń baspasóz qyzmetine silteme jasap.
«29 naýryz kúni Atyraý qalasyndaǵy halyqaralyq áýejaıda jeke tekserý bólmesinde Polıtsııa jelilik bóliminiń patrýl-beket qyzmetkeri abaısyzda qarýmen oq atyp alǵan. Oqıǵa saǵat 17.40 kezinde polıtsııa qyzmetkeri bank ınkassatorynyń qarýyn tekserý barysynda oryn alǵan. Oqıǵa saldarynan qala turǵynynyń aıaǵyna oq tıip, jaraqat alǵan. Áıel birden medıtsınalyq mekemege jetkizildi», - delingen departamenttiń habarlamasynda.
Atalǵan jaǵdaı boıynsha qazirgi ýaqytta tergeý amaldary júrgizilip jatyr.
