Atyraýda pırotehnıkalyq buıymdardy zańsyz satqandar jazalandy
ATYRAÝ. QazAqparat – Atyraýda pırotehnıkalyq buıymdardy zańsyz satqandar jazalandy, dep habarlaıdy QazAqparat.
Atyraý oblysynda 15 jeltoqsannan beri «Pırotehnıka» jedel-aldyn alý is-sharasy ótip jatyr. Maqsat – pırotehnıkalyq buıymdardy zańsyz satýdy anyqtaý.
«Polıtsııa qyzmetkerleri 22 jeltoqsanda saǵat 12:30 shamasynda Mahambet atyndaǵy akademııalyq qazaq drama teatrynyń aldynda 49 jastaǵy azamatshanyń jańa jyldyq feıerverk satqany anyqtady. Sondaı-aq, Erkinqala aýylynyń 30 jastaǵy turǵyny 25 jeltoqsanda túngi saǵat 22:50 shamasynda pırotehnıkalyq buıymdardy satyp, ony «WhatsArp» jelisinde jarnamalaǵany úshin ustaldy. Sol kúni SMP-136 shaǵyn aýdanyndaǵy «Rash» saýda ortalyǵynyń aldynda 23 jastaǵy azamatshanyń da feıerverk satqany belgili boldy» dep habarlady oblystyq polıtsııa departamentiniń baspasóz qyzmeti.
Pırotehnıkalyq buıymdardy zańsyz satqandarǵa qatysty QR Ákimshilik quqyqbuzýshylyq týraly Kodeksiniń 196-babymen ákimshilik hattama toltyrylǵan. Ustalǵandardyń árqaısysyna 25 aılyq eseptik kórsetkish mólsherinde aıyppul salyndy.
Eske sala ketelik, budan buryn Atyraý oblysynda din salasyndaǵy zańnamany buzǵan 98 azamat jaýapqa tartylǵanyn habarlaǵan bolatynbyz.
