Atyraýda Perınataldyq ortalyqtyń eks-basshysy qomaqty qarjy jymqyrǵan
Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń mindetin ýaqytsha atqarýshy Qanat Qojahmetovtiń habarlaýynsha, 2018-2019 jyldary jemqorlyq qylmysqa qatysty densaýlyq saqtaý salasynda 25, bilim berý salasynda 68 derek tirkelgen. Júrgizilgen qylmystyq is sheńberinde bilim berý, densaýlyq saqtaý jáne oǵan baǵynyshty mekemelerdiń laýazymdy tulǵalaryna qatysty tergeýde zań talaptaryn buzýdyń kóptegen óreskel faktisi anyqtalǵan.
«Máseleń, Atyraý oblysy Perınataldyq ortalyǵynyń basshysy ózi basqaratyn kásiporynmen «KAZGıÝÝ Ýnıversıteti» AQ «Mini Master of Business Administration (MBA)» baǵdarlamasy boıynsha «Ákimshilik ister magıstri» mamyndyǵynda óziniń oqý úshin 1 800 000 teńgege kelisimshart jasaǵan. Oqý shyǵyny úshin demeýshilik, qaıyrymdylyq kómekter esebinen aýdarylǵan qarjyny talan-tarajǵa salý jolymen ıemdengen. Sondaı-aq, ol qyzmetkerlerine syıaqy, yntalandyrý syılyǵy jáne aqyly qyzmetter jasaǵany úshin qosymsha aqy retinde barlyǵy 6 978 000 teńgeni negizsiz artyq aýdaryp, aradaǵy bir qyzmetkerine tapsyrma berý arqyly qaıta jınap alǵan», -dedi Qanat Qojahmetov.
Onyń málim etýinshe, neontologııa dárigeriniń Portýgalııa Respýblıkasynda kásibı biliktiligin arttyrý, tájirıbe almasýǵa barýy úshin 1 490 000 teńge qarjylyq kómek bólingen. Alaıda, neontologııa dárigerin issaparǵa jibermeı, onyń ornyna ózi shet memleketke negizsiz barǵan.
«Oblystyq perınataldyq ortalyǵy basshysynyń laýazymyna konkýrsqa qatysqan kezde onyń eńbek ótili 4 jyl 10 aı 24 kún bolǵan. Alaıda, densaýlyq saqtaý uıymdarynyń basqarý laýazymyndaǵy eńbek ótilimi 5 jyldan kem emes bolýy qajet edi. Al, bul laýazymǵa dırektordy Atyraý oblysy densaýlyq saqtaý basqarmasynyń burynǵy basshysy negizsiz usynǵan», -dedi Qanat Qojahmetov.
